Лакрал райондалул бакIчи Юсуп МахIаммадовлул каялувшиндаралу Бабаюртуллал райондалийсса Львовск-3 шяраву (Кьубиял къутандалий) хьунни террорданийн къарщисса комиссиялул батIаву. Ваний гьуртту хьунни Лакрал ва Ккуллал районнал аьралий комиссар Аьли ГъазимахIаммадов, ДР-лул Мюхчаншиврул советрал секретарь Давуд Унчиев, Дагъусттаннал УФСБ-лул Буйнакск шагьрулийсса отделданул каялувчи Исламаьли Расулов, шяраваллал бакIчитал ва къутаннайсса хозяйстварттал агьали.
Юсуп МахIаммадовлул бувсунни райондалий террорданийн къарщисса давуртту ци даражалий дуссарив. КIицI лавгунни терроризмалущал, талайнияр, багьлай бушиву му хIасул хьун къаритан.
Терроризмалул идеологиялийн къарщисса пландалул лагрулий райондалий дуллалисса давурттая бувсунни АТК-лул аппаратрал каялувчи МахIаммад Гадаевлул.
Терроризмалийн къарщину Сангардал школалий дуллалисса давурттая бувсунни директор Магинора АхIмадовал. Ванил тIимунийн бувну, терроризмалул профилактикалул ялув оьрчIащалсса даву ххи дан багьлай бур кIилийну.
Экстремизмалул ва терроризмалул профилактикалул давурттая бувсунни Гъумучиял ва Кьубиял шяраваллал бакIчитурал.
Райондалийсса диндалул объектру терроризмалия ва экстремизмалия мюхчан баврил ххуллий дуллалисса давурттая бувсунни райондалул бакIчинал хъиривчу Явсупи ХIамзаевлул.
ДакIнин бувтунни шяраваллал бакIчитуран мизитру сияхIрайн ласаврил даву анавар дуккан дан багьлай бушиву. Диндалул идарартту сияхIрай бишаврил агьамшиврия бувсунни Давуд Унчиевлулгу.
«Диндалул объектру ва мизитирттавун заназими сияхIрай бишин багьлай бур, терактру дансса кIануну, гьамин, мизитру хъанай бушиврийн бувну», – увкунни Унчиевлул.
