ЦIуссалакрал 1-мур школалий 8-11 классирттал оьрчIащал хьунни «Мы против террора» цIанилусса мероприятие.
Ва хIадур дурну дия школалул педагог-психолог Залина Аьлиевал. Шикку гьуртту хьунни ЦIуссалакрал райондалул Балугъравун къабивминнал иширттаха зузисса ва миннал ихтиярду дуруччайсса комиссиялул хьхьичIунсса пишакар Лиана МаматIиева, райондалул ОМВД-лул уголовный розыскрал отделданул оперуполномоченный Ибрагьин Кьурбанов, школардал директортурал маслихIатчитурал координатор ПатIимат Аьбдулмуслимова, балугъравун къабивминнал иширттал инспектор Рамазан Пахрудинов, «Движение первых» суккушиннарал кIанттул отделениялул председатель Жамилат Мусиева, школардал учительтал ва дуклаки оьрчIру.
Залина Аьлиевал бувсунни терроризмалия, мунил мархрая ва щала дунияллийх ппив хьусса му балаллуйн къарши бацIансса чаранная. КIицI лавгунни, сентябрьданул шамилчинсса кьини Терроризмалущалсса талатавриву цашиврул кьинину баян бувну бушиву. Педагогнал мукунма бувсунни Украиннаву дайдирхьусса фашистътурал суккушиннарая, хасъсса аьралий операциялия. ОьрчIан ккаккан дунни терроризмалиясса, цIусса дуккаврил шин дайдирхьусса кьини Бесланнал 1-мур школалий хьусса иширттаясса видеороликру. Хъирив ихтилатру бунни хъамаллурал. Вайннал бувсунни терроризмалийн къарши бацIансса чаран ляхълай, цукунсса давурттив дуллай буссарив жяматийсса организациярттал. Дюъ дирхьунни оьрчIай личIлулну бикIан, жяматийсса кIанттурдай вихшала дакъасса инсантурал провокациярттавун кIункIу къабан, соцсетирдаву экстремизмалуцIун бавхIусса ихтилатирттавух, сообщениярттавух цукунчIав хIала къабуххан. Бувсунни миннул цIаний уголов жавабрайн буцайшиву. Мероприятиялул гьурттучитурайх дарчIунни щак бутлатисса затру ххал хьусса чIумал, школардай ца къахьунмур хьусса чIумал ва цамургу нигьачIисса тагьардануву цукун сукку тIун аьркинссарив бувчIин буллалисса памяткарду.
Андриана Аьбдуллаева
