ЦIуссалакрал райондалул школардай хьунни Ккавкказуллахлусса талатавриву совет аьралуннал фашистътал ххит бувсса кьинилун хас дурсса Чувшиврул дарсру.

Дуклаки оьрчIахь бувсунни жула халкьуннал чувшиврул тарихрая, Ккавкказуллахлу талай бивкIминнал къучагъшивурттая. Видеоматериаллу ва презентацияртту ххал дурну махъ, оьрчIал бувккунни Ватандалухасса шеърирду. Буттал кIанттул цIанийсса Хъунмасса дяъвилий жанну дуллуминнал аьпалун баян бунни минутрайсса пахъ багьаву.
1942-ку шинал июль зуруя 1943-ку шинал октябрь зуруйн дияннин най диркIсса Ккавкказуллахлусса талатаву Буттал кIанттул цIанийсса Хъунмасса дяъвилул тарихраву ца яла хъуннамур ва агьамшиву думурну хьуссар. Жула буржри Ххувшаву ларсминнал чувшиврия хъирив нанисса никирттахьгу бусан, вирттаврал цIарду дакIний дитан.

Андриана Аьбдуллаева

.