Итни кьини Гъумук хьунни ОьрчIру буруччаврил кьинилун хас дурсса шадлугъру.

Муний гьуртту хьунни райондалул бакIчи Зураб Куччаев, администрациялул зузалт, идарарттал каялувчитал.
БавтIми барча буллай, Зураб Куччаевлул кIицI лавгунни хъирив нанисса никирахсса аякьа паччахIлугърал хьхьичIунсса ххуттай душиву ва райондалул администрациялул бюхъаймур буллай бушиву оьрчIру цIуллуну ва талихI буну хъуни шаврил ялув. Барчаллагь увкунни яргсса байран сакин дурминнахь. ЧIа увкунни оьрчIангу, нитти-буттангу цIуллушиву ва тIайлабацIу.

«КъадучIаннав жула ялун оьрчIал хъяхъаву къабаллалисса чIун! Ххаришиврул къявхъ тIий гьаннав вайннал оьрмулуву гьарцагу гьантта. ОьрчIан хIалалссар ччаву, аякьа ва къулагъас, гьамин вай буну тIий жула ялун бучIантIимур!» – увкунни Зураб Куччаевлул.

КIулшиву дулаврил управлениялул каялувчи Сулайман Шахмиловлул кIицI лавгунни оьрчIахсса аякьа хъанай душиву билаятрал бучIантIимунил ва цIуллусса обществалул гьану. Барчаллагь увкунни хъун хъанахъисса никирал бучIантIимунил ялув захIмат бихьлахьисса тарбиячитурахь ва педагогтурахь.
ОьрчIру барча бунни Зулайхат Макьсудовал, Гъумучиял детсадрал каялувчи Лиана Муртузялиевал, Агьали даврил щаллу баврил центрданул хъунмур Аьйшати Мусалаевал.
ОьрчIан сакин дурну дия аниматорталгу гьурттусса авадансса ва яргсса дялахърулул программа. Мюрщулт гьуртту хьунни цала гьунарду аьч бан бюхълахъисса тяхъасса конкурсирттай, тIуркIурдай ва мастер-классирттай.

«Солнышко» ва Гъумучиял детсадирттал оьрчIал бавтIми ххари бунни балайрдайну ва къавтIавурттайну.
Гъумучиял магьирлугърал школалул тарбиялувтуралгу чIюлу дунни байран цала ярг-яргсса гьунардайну. Ахирданий рирщунни хъама къабитулунсса суратру.

Зулайхат Тахакьаева