Хасъсса аьралий операция байбивхьуния шинмай, билаятран жапасса ппур­ттуву ­аьралитурал махъ уздансса инсантал бушиву ккаккан буллайнма бур жула агьали.

Вай гьантрай ирглийсса гуманитар кумаг тIайла бувккунни ЦIуссалакрал райондалия хасъсса аьралий операциялий талан лагсса аьралитуран. Ва ххаллилсса даврил сиптачиталну бувккунни ЦIуссаккуллал шяравасса меценат Аьппас Аьппасов ва ­Рамазан МахIаммадов.
Вайннал аьралитурачIан лавсун лавгунни кьаркьсса дикIул 100 кг ва 30 кг стейкирдал. Вайннал дурсса даву пахру-ххаралунсса дакъарча, аьралитуран ичIаллил гъилишиву диян дансса, миннал махъ дакI цIимисса инсантал бушиву ккаккан буллалисса дур.
Украиннал аьрщарай ­аьралий бурж бартбигьлагьисса ­аьралитурал барчаллагь баян буллалисса видео дуркIунни дугърисса тIул дурсса Цуссалакрал райондалул администрациялийн, ЦIуссаккуллал шяравасса меценат Аьппас Аьппасовлуйн.
– Барчаллагь зун аьралитураха дуллалисса аякьалухлу. Хъинну тIааьнну бур жула махъ укун чумартсса инсантал бушиву. Зу кунмасса инсантурал дуллалисса давурттан багьа бакъассар. Жугу хъама къабивтун, ссайгъатру хIадур буллай бивкIсса инсантуран, – тIий бур аьралитал.

Имара Саидова