Ларгсса нюжмардий «Дагъусттан» РИА-лий хьунни «Живой карандаш. Живые улицы» тIисса арт-проектрал каялувчи ХIамид Аьлибековлущалсса хьунабакьаву. ХIамид цалла командалущал архIал зий ур оьрчIру мюрщиниява ватан ххирану тарбия шаву мурадрай дуллалисса мультфильмрдансса комиксырдаха.
Ва проектрал лагрулий кIичIирттал цIарду чирчусса кIанттай бикIантIий бур QR-кодру, ччиманаща, цалла телефон ва кодрах дурган дурну, га кIичIираваллин дирзсса цIанил залуннал оьрмулия бусласисса кутIасса фильм ккаккан бюхъаншиврул, кIулну бикIаншиврул жулва вирттал. Укун, гьарцаннал канихь дусса телефон ишла дурну, тарих лахьхьаву, лаласаву бигьа хьун най дур. Хаснува гужирай, цанма гъира бакъанува ци-дунугу дуллали буван, лахьлахьи буван захIмат шайсса оьрчIан.
Цурда ва проект хъанахъиссар жагьилнал чIярусса шиннардий бувсса, студентсса шиннардия шинмайвасса захIматрал хIасилну. Проектралмур сиптарив хьуну бур хар-хавар бакъа, суратру дишаврихунгу агьсса, спортгу, ванивумигу ххирасса ХIамид ва ванал дустал цIа дурксса спортсментурал суратру дихьлай байбишаврия. Ванал дирхьусса цалчинна-цалчинсса сурат хьуну дур UFС-лул чемпион Джон Джонслулсса. Ва сурат цахьхьунна спортсменнахьхьун дулун бюхъаврил ХIамидлувун хъиннува гъира-гьавас бувтун бур. Гихуннай цIа дурксса цаймигу спортсментурал суратру дирхьуну дур.
ЦIанасса чIумал ХIамид Аьлибековлул каялувшиндаралу зий дур цIакьсса команда. Спортралмур темалиягу ливчуну, вай зий бур сюжет дусса композициярттаха. Вай гьанулун ларсун, дуллай бур цIа дурксса инсантураясса, вирттавраясса комиксру, вайннуягу – мультфильмру. ЦIанасса чIумал сайки щаллу хьуну дур Аьрасатнал Вирттал НурмахIаммад ХIажимахIаммадовлуясса, Тамирлан АбутIалимовлуясса, Энвер Набиевлуясса, Чувшиврул кIира ордендалул кавалер Руслан Примовлуясса, Чувшиврул шанна орден ларсъсса МахIаммад Валиховлуясса, аьралий хIакин Бадия Валиеваясса анимациялул фильмру. Вай дуваннин ХIамид цимилагу хьунаавкьуну ур Вирттаврал гъанминнащал, мисалдаран, мукьийла хьунаавкьуну ур НурмахIаммадлул ниттищал, Ссапижатлущал. Ивну ур Руслан Примовлул ватандалийн – ТIагьирккантлив, хьунаавкьуну ур мунал ниттищал, Аидащал, мунал учительтуращал, чIаххувращал, кIулминнащал.
ХIамид Аьлибековлул сипта хъинчулий ккавккун бур региондалул бакIчиналгу. Ванал ка-кумагралгу гьавас бувтун, жагьилсса художниктал хъиннува ххуйну зун бивкIун бур, республикалул художествалул школардайн заназисса оьрчIругу цалла давривун кIункIу буллай. ХIамид хъунмасса барчаллагьрай ур Сергей Меликовлуйн, ва давриву цанма буллалисса ка-кумаграхлу, чIарав ацIаврихлу.
Бюхттулсса Ххувшаврил 80 шинан ва Ватан дуруччул шинан хасну, ларгсса шинал ХIамидлул ва ванал командалул щаллу дурну дур «ВОВеки СВОи» тIисса цIанилусса проект. Ванил лагрулий МахIачкъалалив дурну дур республикалул художествалул школардал оьрчIал дирхьусса Буттал кIанттул цIанийсса Хъунмасса дяъвилул гьурттучитурал суратирттал выставка ва цаймигу давуртту.
Вания тийннайгу Аьрасатнал Халкьуннал цашиврулмурну баян бувсса шинацIунгу, цайми-цайми темардацIунгу дархIуну дуван дакIниймургу чансса дакъар.
Бадрижамал Аьлиева
