Зумаритавал гьантрай, райондалул бакIчи Зураб Куччаевлул оьвкуну, Лаккуйн увкIунни Аьрасатнал Виричу, генерал-лейтенант Сухраб АхIмадов.
Хьунабакьаврий ихтилат хьунни кIанттул властьрал Аьрасатнал ярагъуннил гужирдал вакилтуращалсса уртакьшиву цIакь даврия.
Ххал бивгьунни райондалул жагьилтурайн багьайсса агьамсса суаллу. Хъунмур къулагъас дунни жагьилтурал аьралий бурж лахъаврих, аьралий идарарттайн дуклан буххаврих, аьралийтал къуллугърал лавай хьунсса каширдах.
Му бакъассагу, кIицI лавгунни райондалул агьалинал хIал-ахIвал лавай шаврил ва район хьхьичIуннай шаврил ххуллийсса суаллу.
Хаснура къулагъас дунни хъун хъанахъисса ник ватан ххирану, ппухълунная нанисса виричушиврул аьдатирттал хIурмат буну тарбия даврих. ЧIурчIав дурунни ватан дуруччултрал лайкьсса ирс тарбия баврил ххуллий, кIанттул властирдащал ва аьралий структурарттащал жяматгу цачIун хьуну, зун багьлай бушиврий.
Зулайхат Тахакьаева
