Дагъусттаннал паччахIлугърал ссихьрал театрдануву ци-дунугу постановка, спектакль къабивхьусса бигьалагай кьини къашай. Ва ххуллухь тIурчарив шиву хьунни «В волшебном мире кукольного жанра» тисса Республикалул IV выставка.
Жулла республикалий мукьийлчин хъанахъисса ва выставка дуллалиссар тамашачитал театрданул персонажру, геройтал баврил искусствалущал, художествалул сипатирттал журардащал кIул баву мурадрай.
Выставкалий дирхьуну дия авторсса ссихьри, ляличIисса скульптурарду ва ссихьрал костюмру, Дагъусттаннал паччахIлугърал ссихьрал театрдануву личIи-личIисса шиннардий дурну диркIсса ссихьри, маскарду ва костюмру. Дия махъсса шиннардийсса «Сон в летнюю ночь», «Маленький принц», «Ханума», «Времена героев», «Хочбар», «Щелкунчик», «Алые паруса», «Маленькие трагедии», «Мертвые души», «Нурудин – золотые руки», «Кавказский меловой круг», «Красавица и Чудовище», «Тигр на улице» тIисса постановкардавассагу, цIа дурксса художниктуралсса кунна, цайнува цивппа хьуминналссагу. Итталун багьлай бия цIа дурксса художник Наталья Савельевал оьрчIи-кIури бувсса къавахъру-лагенарии.
Мудангу хьхьичIунминнувухсса Каспийскаллал ОьрчIал художествалул школалийн заназисса оьрчIал личIи-личIисса затирттая дурмунил чIарах гьан шайссагу цучIав акъая.
Ва кьини Ссихьрал театрдануву хьума цана цува магьрал дунияллийн агьсса куна чIалай ия.
Театрданул актертурал личIи-личIисса спектакллавасса парчригу ккаккан бунни.
Бадрижамал Аьлиева
