Аьрасатнал аьралуннаву ялу-ялун чIяву хъанай бур Украиннал аьрщарай нанисса хасъсса аьралий операциялий ккаккан дурсса чувшиврухлу наградартту лайкь дурсса вирттал.
Вай гьантрай хасъсса аьралий операциялий гьуртту хъанахъисса ЦIуссалакрал райондалийсса Гьамиящиял шяравасса Кьурбаннул арс Юнус Оьмаровлун аьралий бурж бартбигьлай ккаккан дурсса чувшиврухлу дуллунни «За боевые отличия» тIисса медаль.
Шиккува кIицI лаган, ва хъанахъиссар Минобороналул ведомствардал чулухасса ца яла сийлиймур награда, цурдагу ляличIисса къучагъшиву ва аьралийчунал профессионализм ккаккан даврихлу дулайсса. СВО-лий гьуртту хъанахъиссаксса хIаллай, Юнуслул ччясса мутталий лайкь дурну дур майорнал чин.
Гьамиящиял 2-мур школагу къуртал бувну, ва дуклан увххун ур ва Дальневосточный командный училищалувун. Спортраву итххявхсса Юнус ур каруннах бияврил армейский спортрал мастер.
Хасъсса аьралий операция байбивхьуния шинай Ватандалул мурадру бартбигьлай дурсса къучагъшивурттахлу лайкь хьуну ур Суворовлул ва «За отвагу» медальлан ва Аьрасатнал Обороналул министерствалул чулухасса цаймигу наградарттан.
Ватандалийн кьини дурксса чIумал ванал тасттикь бунни, цува кьянкьасса низам дусса, вихшала дишин лайкьсса, хIакьсса патриот ушиву .
Жула миллатрал къучагъсса арсру цIуллу баннав, дакIру ххарину зана хьуннав!

Имара Саидова