Москавлив Литератортурал къатраву хьунни «Золотое перо Руси» тIисса, Миллатрал литературалул премия дуллалисса мажлис. Ва хъанахъиссар чичултрал дянив ца яла сий думур ва машгьурмур конкурс. Ванил дур цила лишан – Мусил тIиму.

Гьашинусса конкурсрай литературалул ххуллийсса лайкьшивурттахлу наградартту ларсминнавух ур Дагъусттаннал халкьуннал чичу Хизри Илиясовгу. «Ттул Ватан» номинациялуву Хизрин буллунни «Серебряное перо Руси» диплом ва «Арцул тIиму» лишан. Ванан награда дуллунни шаэр, философиялул элмурдал доктор, А. М. Горькийл цIанийсса Литературалул институтрал профессор Константин Кедровлул.
НукIувасса цала студент дакI­нийхтуну барча уллай, Аьрасатнал Чичултрал союзрал член Игорь Волгин чичлай ур: «Ттун кIулссия Хизри Илиясов Литературалул институтрал студентсса чIумала. Евгений Долматовскийщал архIал на вайннахь творчествалул семинарду байссия.
Хизрия ххаллилсса чичу хьунни, Дагъусттаннал халкьуннал чичул цIа лайкь дунни. АрхIала ва элмийсса давугу дачин дурну ур. Ва ур гьарица чулуха бюхъу бусса чичу, икIайкунсса гуманитарий. Хизри чичлай ур оьрус мазрай ва лакку мазрай, мунийну кIивагу маз авадан буллай.
Ванал бур буккултран ххира хьусса прозалул щаллусса цикл. КуртIсса, ххаллилсса произведенияртту бур. ЛяличIину кIицI лагавияв «Ккавкказ миллатрал жинсру» тIисса лу.
Оьруснал литературалул оьр­мулуву, Аьрасатнал интеллектуал оьрмулуву Ккавкказнал цуксса агьамсса кIану бугьлагьиссарив ккаккан буллай ур Хизри цала прозалуву. Ва бур чIявусса тарихрал ишру ккаккан буллалисса эпопеялул журалийсса произведение. Ванал прозалува «Ккавкказ миллатрал жинсру» тIисса лу ттун ляличIинува ххуй бивзунни, муничIансса хьхьичIмахъгу гъирарай чивчуссия».
Жугу барча уллай буру Хизри Илиясов лайкьсса наградалущал. Чичлансса гъирагу, гьавасгу тачIав къалещаннав. Кьалан байл хьуннав.

Андриана Аьбдуллаева