Ларгсса шинал ноябрь зуруя шихунай хасъсса аьралий операциялий Ватандалул мурадру буручлачисса Ккурккуллал шяравасса Гъазинал ва Зоял арс, 1-мур статьялул старшина Мурад Сагидов вай гьантрай лайкь хьунни 2-мур даражалул «За воинскую доблесть» медальданун.
Калиново поселокрал даралуву операция нанисса чIумал нигьачIисса тагьарданий Мурадлул сант руртун дур подразделениярттал дахIаву дан, мукунма ФПВ дроннан ххуллу кьукьин. Ванал сипталий хьуну дур аьралийтал талатавурттайн ва щавурду дирми нигьачIисса кIанттурдая буккан бан вардиш буллалисса тактикалул ученияртту. Мурадлул усттаршиврийну ва сант кIулшиврийну ­аьралий шартIирдай соединениярттал дянивсса дахIаву цIакь дан бювхъуну бур. Вай ккаккиярттахлу лайкь хьуну ур Обороналул министерствалул наградалунгу.
Ккурккуллал школагу къуртал бувну, Мурад увхссия Дагъусттаннал педагогикалул университетравун. АрхIала заочнайну дуклай ия С.Орджоникидзел цIанийсса Машиностроениялул ва сервисрал колледжравугу. Институт къуртал байхту, 2013-ку шинал, лавгуна аьралий бурж лахъан. Къуллугъ буллай уссия Камчаткалий. ЧIун къуртал шайхту, контракт чирчуну, аьралуннаву авцIуна. 2025-ку шинал лавгуна хасъсса аьралий операциялийн. ЦIана ва къуллугъ буллай ур Константиновкаллал направлениялий,1-мур мотострелковый взводрал 2-мур мотострелковый отделениялул хъунама битуну.
Мурад ххуйсса тарбия ларсъсса, яхI-къирият дусса, кьянкьа-кьурчIисса жагьилли. Аьралийтурал дянивгу хIурмат буну ур.
Мурадлух шаппа ялугьлай бур кулпат, кIива мюрщисса душ.
ДакI ххарину, цIуллуну зана хьуннав.
Андриана Аьбдуллаева