Жяматийсса транспорт ва ххуллул хозяйство лядуккан давриву Дагъусттаннал 2025 шинал тамансса хьхьичIуннайшиву хьун дурну дур. Муния бувсунни ДР-лул вице-премьер Ризван ГъазимахIаммадовлул Транспортрал ва ххуллул хозяйствалул министерствалул 2025 шинал дурсса давурттал хIакъиравусса гьартасса коллегиялий.

Ризван ГъазимахIаммадовлул бувсмунийну, ларгмур шинал ведомствалул ккаккиялун­сса хьхьичIуннайшивуртту хьун дурну дур ххуллурду бавриву ва транспортрал комплексру лябуккан бавриву.

Вице-премьренал дакIнин бувтунни, 2025 шинал хIасиллайн бувну, Дагъусттаннал проектирдал команда лайкь хьуну диркIшиву АьФ-лул дипломран «Оьрмулунсса инфраструктура» национал проект бартдигьаврихлу. Яла агьамми инфраструктуралул проектирдан ккалли хьуну дур дукIу буллай байбивхьусса МахIачкъалаллал хьхьирил машлул портрачIансса мукьва полоса бусса ххуллу.
Му бакъассагу, цIана бу­ллай бур Дарбантуллал лагмасса ххуллу. Къуртал дурну дур МахIачкъалаллал ух­ссавнил чулуха лагма буккай­сса ххуллу баврил документир­ттал паччахIлугърал экспертиза. Вице-премьернал мукунма бувсунни къуртал дурну душиву «Кавказ» федерал ххуллул 17,1 километралул капитал ремонт ва хIадур бувну бушиву Каспийлул зуманийсса туристътурал кластерданучIансса хху­ллул проектрал документру. Ми давуртту дайдишинтIий дур гьашину.
Коллегиялий махъ лавхъу­нни ДР-лул транспортрал ва ххуллул хозяйствалул министр МахIаммад ТIагьировлул. Ванал гьартану бувсунни 2025 шинал ведомствалул дурсса давур­ттал хIасиллая ва гьашину дан-дитанмуния.
«Ларгсса шинал давурттан ишла дурну дур 23,7 млрд къуруш, бувну бур 22,1 километра цIусса ххуллурдал ва 11 ламу, бакьин бувну бур 442 киломера ххуллурдал. Му бущилий ттинияр тихунмайгу бачирча, жуща бюхъантIий бур кIантту- кIанттурдайсса масъаларттугу дузал буллан, зунттал районнаймигу, дазурдацIухмигу хIалану»,– увкунни МахIаммад ТIагьировлул.

Министрнал бувсунни ларгмур шинал дурсса агьамми давурттуну хъанай душиву МахIачкъалаллал хьхьирил машлул портрачIансса ххуллу буллай байбишаву, Р-217 «Кавказ» федерал ххуллул капитал ремонт ва «Ттул Дагъусттан – ттул ххуллурду» тIисса проект лядуккан даву.
ТIагьировлул бувсунни мукунма зунттавусса ххуллурду баврил хIакъиравугу.
ДукIу зунттал районнай бувну бур 12,9 километралул манзилданийсса 25 ххуллу ва 7 ламу. «Жун ца агьамсса масъалану чIалай бур зунттал районнал дянив дахIаву душиву, – увкунни ванал. «Анцух- Тлярата» ххуллу бакьин баврийну ТIиларатIиял райондалий бувссар асфальт бавкьусса ххуллу».
Министрнал бувсунни мукунма 2026 шинайнсса агьамми масъаларттая. Миннувасса ца хъанай бур «Дагъусттан Республикалул транспортрал комплекс лябуккан баву» тIисса паччахIлугърал программалий ккаккан дурсса давуртту дузрайн дуккан даву. Микку бан аьркинссар 74,6 километра ххуллурдал ва 3 ламу, мукунма бакьин бан аьркинну бур 473 километра ххуллурдал ва 2 ламу.
Гьашину дузрайн буккан буван аьркинссар мукунма МахIачкъалаллал хьхьирил машлул портрачIансса ххуллу, буллай байбишин аьркинссар «Каспийскаллал зумардацIухсса кластер», субсидияртту итабакьлан аьркинссар муниципалитетирттал кучардал ххуллурду дузал буллан, гьарта буллан аьркинссар авациялул маршрутрал сетьру ва цаймигу давуртту.

Ихтилатру къуртал хьуну махъ хьунни дискуссия, муний министерствалул ведомствардайн багьайсса предприятиярттал каялувчитурал бувсунни инфраструктурарттал проектру бартдигьаврил хIакъиравусса цалами пикрирду.
Коллегиялул ахирданий наградартту дуллунни отраслилуву хьхьичIунну зузиминнан. Миннан буллунни дипломру, хIурматрал грамотартту ва барчаллагьрал чагъарду транспортрал комплекс лябуккан бавриву бивхьусса захIматрахлу.
«Илчи» кказитрал редакциялул хъунама редактор Руслан Къардашовлун дуллунни ХIурматрал грамота ДР-лул Транспортрал ва ххуллул хозяйствалул министерствалущал хIала-гьурттуну зузаврихлу.

ХIасан Аьдилов