Ххюлуссуннал шяраваллил жагьилтал лавгун бур хасъсса аьралий операциялий кIусса щавурду дирну, Къиримнавусса Балаклава шагьрулул госпитальданий хъин хъанахъисса жула ватанлувтурачIан.

Шикку хъин хъанай ур Гъумучатусса Исакь СалихIов ва Ххюлуссуннал шяравасса ХIажимурад Акаев. Жагьилтурал барчаллагь увкунни талаталтрахь аьралий мурадру ­биттур бавриву ккаккан дуллалисса къучагъшивурттахлу.
«Жун ччай бия цивппа дакIния къабуккайшиву жула вирттавран ккаккан бан. Тай, жанну хIайп къакуну, талай буссар жула ялун бучIантIимунил цIаний, жунгу ччай бур жува чIарав бушиву ккаккан бан», – тIий бур жагьилтал
Талаталтгу барчаллагьрай бур ялтту буккан бувкIминнайн, укунсса хьунабакьавурттал дакIниву гьавасгу, кьуватгу ххи буллай бушиву кIицI лаглай.
Укунсса сиптардал бу­слай бур жяматрал чулухасса чIарав бацIаврил ххуллийсса даврия, ­билаятрал ялун дирсса захIматсса кьини цуксса агьамну дуссарив агьалинал цашиву.

Зулайхат Тахакьаева