Ккуллал райондалий «Знание о главном» тIисса проектрал лагрулий райондалул бакIчи Шамил Рамазанов хьунаавкьунни дуклаки оьрчIащал.
ДакIнин бутан, Аьрасатнал Халкьуннал цашиврул кьинилун хасну, Дагъусттаннай дайдирхьуссар дуклаки оьрчIру муниципал образованиярттал хъуниминнащал хьунабакьлакьисса проект. МуницIун бавхIуну, Ккуллал райондалул администрациялул къатраву хьунни хьунабакьаву.
Шикку дуклаки оьрчIал суаллу буллунни, ихтилатру бунни ва цала пикрирдая бувсунни Шамил Рамазановлухь.
Райондалул бакIчинал бувсунни «Знание» тIисса жяматийсса паччахIлугърал просвещениялул идаралия, цилгу 1947-ку шиная шийнмай гьану бивзсса. Ва идаралул хьхьичI бивхьусса мурад хъанай бур миллатрал дянив кIулшивуртту дулаврил даву машгьур даву.
Халкьуннал цашиврул байран хъанай дур миллатирттал дянивсса дусшиврул, куннал кув бугьаврил барашинна. Дагъусттаннал аьрщарай ялапар хъанай бур республика хьхьичIуннай давриву хъунмасса бутIа бивхьусса цикссагу миллатру.
Аьрасатнал президент Владимир Путиннул мудангу кIицI лагай билаятрай ялапар хъанахъисса миллатирттал циняв мазру, культура, тарих ва аьдат-эбадатру цIакьну ядан ва дуруччин аьркиншиву.
