Гьарца шинал август зурул кIилчинми бигьалагай гьантрай дуллай аьдатравун дагьну дуссар Шахьував Шяраваллил Кьини. Гьашину августрал 10-11-нний дунни Шяраваллил байран. Ваний гьуртту хьунни Москав, Калининград, Ростов-на-Дону шагьрурдай ва Аьрасатнал цайми-цаймигу кIанттурдай ялапар хъанахъисса шахьуйми ва хъамал.
Шяраваллил кьинилул лагрулий дуллалисса шадлугъирттаву хъунмасса кIану буллуну буссар спортралми бяст-ччаллахьхьун. Агарда хьхьичIра Шяраваллил кьини анжагъ дукрардащалсса ссупралух щябивкIун, балайрдайну, къавтIавурттайну щаллу шайсса диркIхьурча, 2019-ку шиная шийннай ва Кьини дувайсса тяхъашивруцIун спортгу цIакьну дархIуну дуссар.
Ва ишираву хъуннасса даву дуллай, бунияласса хъар лахълай буссар шяраваллил «Шахьуйми» тIисса фондрал жагьилтал. Шяраваллил кьини дучIан нюжмардал хьхьичIва байбивхьуну, аьркинсса грамотарду, кубокру ва цаймигу бахшишру хIадур дуллай байбишайссар вай. ВайннацIун, шайнал шайсса кумаг бувну, кабакьайссар шяраваллил жяматралгу. Уку-укунсса давурттал, щак бакъа, шяраваллил жагьилтурал ва оьрмулул бугьараминнал дянивсса арарду цIакь дуллалиссар, цIуллу-цIакьсса оьрмулул кьарал, спорт махъа нанисса никираву машгьур дуллалиссар.
Шяраваллил Кьинилул байрангу кIира кьини лахъи лагайссар. Мяйжаннугу, вай кьинирдай оьрмулул личIи-личIисса шиннардил ва оьрмулухсса личIи-личIисса бургавурттал инсантуран хIаз дизанмур, даши дизанмур чан къашайссар.
Байрандалул цалчинмур кьини, августрал 10-нний, ккаккан дурсса чIумал ккаккан бувсса кIанайн бавтIун цинявппагу, хьунни спортрал личIи-личIисса бяст-ччаллу. Ва аьдат дахьра цилла нирхиравун дагьлагьисса чIумал мюрщи оьрчIру ва чIава жагьилтал, мукунма бугьарами, гьуртту хъанан сикъаслай, нач хъанай бивкIхьурчан, тти, оьрмулул га яла чIивиманая байбивхьуну, угьараманайн бияннин, гьуртту хьун ччиминнал ккал хъуннассар. Спортрал цалла дакIнил лавсмур жура язи бугьлай, гъирарай гьуртту хъанай бия оьрмулул личIи-личIисса шиннардил инсантал. Яла чIавама гьурттучинан дия 5 шин, яла хъунаманан – 60-нниха лирчусса.
Байрандалул кIилчинмур кьини – августрал 11-нний, колхозрал багъраву хьуна чIатIаракI ритаврил бяст-ччаллу. Ванийгу хъунмасса гъирарай гьуртту хъанай бия, ялун дагьсса гъаралунниягума нигьакъабувсун. ТIайлассар, вания гихуннай дувайсса волейболданулмур турнир къадурнура лирчIунни, гъарал сававну.
Оьрмулул мюрщиминнан ва хъуниминнан дакIний личIансса хьунни тяхъашиврулмур бутIагу. Музыкалул инструментру бищаврийну ва цалва балайрдайну мажлис чIюлу буллай бия чIаххуврайсса КIундиннал шяраваллил Культуралул къатрал директор Даниял ХIажиев, лакрал балайчитал Щаза Саидова ва ХIабибуллагь Кьурбанов, Лакрал театрданул артист Ислам МахIаммадов. Вайннавух хIала бувххун, цалвами гьунардугу ккаккан бувна балай учаврилмур бюхъугу биялну бивсса шахьуйннал.
Шяраваллил кьини хьуна дакIний личIансса, ялуннийнмуних ссавур дакъа ялугьлансса.
Бадрижамал Аьлиева
