МахIачкъалалив шагьрулул пляжрай тIивтIунни хъун ба­къасса цIусса мизит. Ца зивулийсса исвагьисса мизит 50 инсан чаклийн лагайсса бур. Хъаннин личIисса къаттагу, хьулугу бур.

Ва мизитрал хIакъираву укун бувсунни мизит тIитIавриха чялишну зий ивкIсса АхIмадлул арс Багьауттин Рабадановлул.
– Жул вотсап группа бу­ссар – 70-80 адамина, 30- нниха ливчусса хъами бусса. Цукунсса гьава бухьурчагу, гьарца кьини хьхьирийн батIайссару волейболданий буккан, щинавун бучIан. Гьаннайсса, спортрахун машхулсса группар. «Хьхьирил барцIру» тIисса цIагу дуссар жул ккурандалун. Циняв миллатирттал агьлу буссар. ХьхьичIва ца будка бикIайссия, жу таниву чак бувайссия. Лапва бух бувксса бур куну будка бувкьуна шагьрулул администрациялул, жугу чак бансса кIану бакъа ливчIунав. Туристъталгу цIухлан бикIайва, чак чув бантIиссар тIий, ламусравун багьлан бикIайвав. Жу хъирив буклай, пляжрай чара бакъа чIиви-хъунсса мизит аьркиншиву бувчIин буллай буссия, жухь жува буванну мизит тIий бия. Масъаламур лахъи лаглай бия. Жу шагьрулул администрациялухь тавакъю бувссия, мизит жува буваннуча, так мизит бансса кIану булара куну.

ДакIнийхтунусса барчаллагь шагьрулул мэр Юсуп Умавовлун, уква буллунни мизит бансса кIану. Ца къуруш щилчIав тIалав къадунни. Группалуву 20 шинава байбивхьуну, 80 шиная ливчусса агьлу буссар. ДартIун арцугу, дачIи шинал мутталий мизит бувну бацIан буварду. Мизит тIитIлатIисса кьинигу, агьалинан дакIний личIан, 3 къазан пулавралгу шавхьуну, волейболданул турниргу дуварду, хьхьичIун ливчусса командарттан (хъаннилсса личIину, чиваркIунналсса личIину) арцуйнусса премиярттугу дуллуну.
– ЦIанакул билаятрай тагьаргу бигьасса дакъар, СВО най бур. Щил-дунугу даннин тийнмай къабавцIуну, хIала бувххун шаймур дуллан аьркинни. Ва даву ттуйн къадагьайссар къатIий, хIала буххарча, лябукку бикIантIиссар, марцIсса, лалавкьусса шагьру хьунтIиссар. Жулва биялалиймур буллан, ка кIидахIлан, иширайну чIарав бацIлан аьркинсса чIун дур. Миллатру личIи къабуллай, дусшиврий хIала бувххун ва даву бакIуйн дуккан дуван бюхъаврия ххаришиву дур дакIниву, — тIий ур Багьауттин.
Шагьрулул мэр Юсуп Умавовлулгу кIицI лав­­гу­нни ва мизит шагьрулул рувхIанийсса культура гьаз даврил ххуллийсса даву душиву, маслихIат бунни скамейкарттугу бишин, чIивитIухъул цулцу буллансса столгу бишин, мюрщи­сса оьрчIал ниттихъал къулайшиндаран. МахIачкъалаллал Имамтурал советрал хъунама Даниял Умаиловлулгу барчаллагь увкунни ва мизит баврил давривух гьуртту хьусса гьарца каснахь. Меценатътуран ва строительтуран буллунни Муфтиятрал цIаниятусса Барчаллагьрал чагъардугу. Мизитрал имамну ивтунни МухIаммад Давудов.
Утти хьхьирий бигьалагламиннаща ва шагьрулул паркравун сайрданий бувкминнаща чIумуй чак буван шавантIиссар исвагьи­сса мизитраву.

ПатIимат Рамазанова