Июль зурул 22-нний МахIачкъалалив, Родопский бульварданийсса Дагъусттаннал халкьуннал шаэр, гьунар бусса чичу, таржумачи, критик, жяматийсса ишккакку Юсуп Хаппалаевлул гьайкалданучIа хьунни шаэрнал цIанийсса ирглийсса премияртту дуллалисса мажлис.
Шикку гьуртту хьунни ДР-лул Жяматийсса палаталул председательнал хъиривчу Ссапарбаг Аьбдуллаев, Мариян Илиясовал цIанийсса ихIсандалул фондрал президент Гульшан Хасаева, шаэр, публицист, ДГТУ-рал ингилис мазрал кафедралул каялувчи Жанна Абуева, ДР-лул лайкь хьусса энергетик Аьбдулхаликь Халикьов, Дагъусттаннал культуралул министрнал хъиривчу Мурад ХIажиев, Республикалул Музыкантътурал советрал председатель Хан Баширов, Дагъусттаннал Чичултрал союзрал правлениялул председатель Марина АхIмадова-Колюбакина, Дагъусттаннал халкьуннал шаэр ПатIимат Рамазанова, Дагъусттаннал халкьуннал чичулт Мирза Давыдов, Бике Кулунчакова, Багьауттин Аджиев, Аминат Аьбдулманапова, жагьилсса шаэртал, журналистътал, творчествалул интеллигенция, дуклаки оьрчIру ва шаэрнал мачча-гъанми.
Мажлис бачин бувну ия Дагъусттаннал Чичултрал союзрал лакрал секциялул хъунама Супиян Оьмаров
Премияртту ласласими барча буллалисса ихтилат бувна Марина АхIмадова-Колюбакинал.
– Юсуп Хаппалаев, махъ бакъа, гьунар бусса шаэрди. Ванал чивчуссар ххаллилсса шеърирду. ПасихIсса ва усттарсса шеърирдайну бакъассагу, ванал лакрал миллатрал литература авадан дурссар дунияллул классикалул произведенияртту таржума баврийнугу. Шаэртал уттавассар, ми дакIний буссаксса, миннал шеърирду ккалай буссаксса ва ми жяматрал зумув буссаксса. Юсуп Хаппалаев ия икIайкунсса халкьуннал шаэр, ва тачIавгу халкьунная, цала миллатрая арх къаувцссар. ДакIнийхтуну барчаллагьрай бура уздансса буттал цIа дуручлачисса ванал чумартсса наслулийн, – увкунни ванил.
Хъирив ихтилат бувна Гульшан Хасаевал.
– Миллатирттал машгьурсса шаэртурал цIарду абад дуллалисса аллеялий ца яла я бацIанмур дур яргну оьрму бувтсса Юсуп Хаппалаевлул гьайкал. Хъирив нанисса никиран ва щалагу лакрал миллатран кьабивтссар ванал авадансса поэзия. Шаэрнал творчествалуву ттун ляличIину асар хьунни ванал пагьму-гьунар буну бувсса таржумартту. Цуксса цукун пасихIну лакку маз кIулну бикIан аьркинни Шота Руставелил «ЦIиникьрал луттиравусса нарт», хьхьичIазаманнул индиянал «Махабхарата» эпос, Пушкиннул, Лермантовлул ва цаймигу произведенияртту лакку мазрайн таржума бувсса шаэр. ХIакьину жува шиккун батIин савав хьусса шаэрнал наслулул исват бунни Юсуп цала гьунардануцIун цIакьсса тарбиячигу ивкIшиву, – увкунни Гульшан Хасаевал.
Ихтилат бувна Юсуп Хаппалаевлул цIанийсса премиялул лауреат ПатIимат Рамазановал.
– Юсуп Рамазанович гьунар лавайсса шаэргу, инсаншиврул бутIа буллусса, мукъуй цIу бусса инсангу ия. Тамансса хIаллай зий уссия ва «Илчи» кказитрал редакциялий. Бюхттулсса даражалул шаэрнащал зузиссаксса хIаллай нагу бувккуссар лавайсса журналистикалул ва шаэршиврул школа. ХIакьину ттул дакI дарцIунни, цукунсса, ци замана бучIарчангу, шаэрнал цIа, шаэрнал творчество миллатрал дянив уттарану дикIантIишиву, – увкунни ванил.
Шаэр дакIнин утлатисса, ванал творчествалун лавайсса кьимат бишлашисса ихтилатру бунни Мирза Давыдовлул, Багьауттин Аджиевлул, Бике Кулунчаковал, Аминат Аьбдулманаповал, Хан Башировлул ва Аьбдулхаликь Халикьовлул.
Ссапарбаг Аьбдуллаевлул кIицI лавгуна Юсуп Хаппалаевлул цIа абадлий яхьунтIишиву Дагъусттаннал культуралул ирс ябуллалиминначIа.
Гьашину Юсуп Хаппалаевлул цIанийсса премиялул лауреатъталну хьунни Лакрал театрданул актриса Зульфия Архилаева, шаэр, публицист Супиян Оьмаров ва «Зунттал хъами» журналданул художественный редактор ХIулаймат Кьурбан-Адамова.
Ххув хьуминнан премияртту дуллай бия шаэрнал арсру ва душ.
Хъирив Дагъусттаннал шаэртурал бувккунни миллатирттал мазурдийн таржума бувсса Юсуп Хаппалаевлул шеърирду. Лакку ва оьрус мазурдийсса шаэрнал шеърирду буккунни дуклаки оьрчIалгу.
Ахирданий ихтилатру бунни шаэрнал арсурваврал ва душнил. Барчаллагь увкунни цинявппагу мажлисрай гьуртту хьун бувкIминнахь.
Имара Саидова
