Дагъусттаннал бакIчи Сергей Меликовлул барча бунни полициялул зузалт ва виваллил иширттал органнал ветерантал пишалул байрандалущал – Аьра­сатнал Виваллил иширттал органнал зузалал кьинилущал.

«Ва дур паччахIлугърал мурадру буручлай, тахсиркартуран ххуллу кьукьлай, агьалинал оьр­мурду ва ихтиярду дуручлай низамрал къаралданий бавцIусса цимирагу никирал зузалтрал байран.
Гьарицагу чIумал виваллил иширттал органнал зузалтрал лайкьну биттур буллай бивкIссар бигьа бакъасса, чIярумур чIумал нигьачIаву дусса къуллугърал бурж.
Къуллугърайн дакI тIайла­шиву, чувшиву, ччимур чIумал аьркинний кумаг бан хIадуршиву дур полициялул зузалал агьамми хасиятру.
Зузикьинирдайгу, байраннайгу виваллил иширттал органнал зузалт бавцIуну бур низамрал къаралданий.
Щиннияргу хъинну зун кIул­ссар шиная шинайн оьхIалсса тахсиркаршивуртту чIяру хъанай душиву. Миннун ххуллу кьукьиншиврул органнал зузалтрал гьаз дуллан аьркинссар цала усттаршиву, пишакаршиврул даража, кIулну бикIан аьркинссар ттизаманнул ларайсса техникалущал зун.
Жунма хъунмасса пахру бу­ссар хIакьину хасъсса аьралий операциялий Ватандалул мурадру буручлачисса дагъусттанлувтурая.
ЛяличIинува кIицI лагавияв къуллугърал ветерантал.
Зу буру хIаписарнал чиндалул кьимат кIулсса, лавайсса яхI-къириятрал заллухъру. Зуя эбрат лавсун, лайкьну къуллугъ буллан аьркинссар жагьилсса зузалт», – увкунни Республикалул бакIчинал.
Андриана Аьбдуллаева