Шалласу Шалласуев, жяматийсса ишккакку:
– Гъирарай гьуртту хьура Республикалул бакIчинал Рисала ккалаккисса мажлисрай. Рисала дия куртIсса пикрирду бусса, гьарца иширая хавар бусса. ХьхьичIун лавсун бия агьалинал хасъсса масъалартту. КIицI лавгуна мюрщисса оьрчIая тIайла хьуну, хъунив хьуминнайн бияннин миннаха цукун зун аьркинссарив. Жула хIакьинуния тийннайсса даву цукун дуллан аьркинссарив, хIукуматрал жунма буллалисса кумаг цукун ишла бан аьркинссарив, жулва шагьрурду эбадатрайн буцин, ххуллурду бакьин буван аьркиншиву. Республикалул бакIчинал бувсуна дяъвилия занабивкIсса мушакъат хьусса оьрчIаха, ти­кку жанну дуллуминнал кулпатирттаха зун аьркиншиву, ми хъамабитлан къабучIишиву. Ва хъуннасса къулагъас дуллай ия зунттал щархъавусса агьалинал багьу-бизу къулай баврих. Гьарица инсаннал цала къуллугърал бурж дакI марцIну биттур булларчанни жула билаятрал кьуват гужлан хьунтIисса.

Сапижат Мазаева, Аьрасатнал Виричу НурмахIаммад ХIажимахIаммадовлул нину:
– Дагъусттаннал бакIчинал сантирайн дуртун дунни ва ххуллухьсса Рисала. Ванал кIицI лавгуна хъуннасса къулагъас дан багьлай бушиву Ватандалул мурадру биттур баврил ххуллий Украиннал аьрщарай нанисса хасъсса аьралий операциялий гьуртту хъанахъисса дагъусттанлувтурах ва миннал кулпатирттах. Мукунма Рисалалуву хъуннасса къулагъас дур школардай, садикирттай гьануцIакулсса ремонтру дуваврил, кIулшивуртту дулаврил даража гьаз баврил, культуралул идарарттал ва цIуллу-сагъшиву дуруччаврил масъаларттах. ХIасил, жула бакIчинан ххуйну кIулну бур региондалул циняв масъалартту.

ХIажи Султанов, ДР-лул экономикалул министр:
– Рисала дия хIакьинусса кьини яла хьхьичIунми ва барткъабивгьуну чара бакъами ма­съалартту кIицI буллалисса. Меликовлул личIинува кIицI лавгунаа республикалул экономикалул тагьар хьхьичIуннай даврил, миллатрал проектру дузрайн дуккан даврил масъалартту. Ца яла агьаммур масъалалун ккалли бувна хасъсса аьралий операциялий гьуртту хъанахъиминнал кулпатирттах аякьа даву, миннал чIарав бацIаву.

Султан ХIамзаев, Аьрасатнал Федерациялул Думалул депутат:
– Халкьуннал Мажлисрайнсса Рисалалуву Дагъус­ттаннал бакIчинал кIицI лавгуна хIукуматрал къуллугъирттай зузиминнал хьхьичI бивхьусса мурадру. Вай мурадру бур Дагъусттаннал агьалинал оьр­мулул шартIру къулай даврил цIанийсса. БакIчинал чIурчIав дурна Рисалалуву кIицI лавгсса цинявппагу масъалартту бартбигьин аьркиншиврий.

Камил Давдиев, ДР-лул Халкьуннал Мажлисрал председательнал хъиривчу:
– Дурсса даврия бусаву бакъассагу, депутатътурайнсса, Дагъусттаннал агьалинайнсса, республикалул цIурювкьусса масъалартту чулийн буккан баву мурадрай дуллалисса дия Республикалул бакIчинал оьвчаву. ХьхьичI ххуттай бивхьуна республикалул социал-экономикалул тагьар къулай даврил масъалартту.
Хаснува Рисалалуву чIурчIав дурна хасъсса операциялуву гьуртту хъанахъисса аьралитурал ва жанну дуллуминнал кулпатирттал чIарав бацIаврий.

Артур Исрапилов, Законодательствалул, законнал, паччахIлугърал строительствалул, кIанттул цила каялувшиндарал ва регламентрал комитетрал председатель:
– Республикалул бакIчинал гьаз бувна сайки цинявппагу цIурювкьусса масъалартту. Хаснува ттун даши бивзуна кIанттул цила каялувшиндарал реформартту лядуккан даврил хIакъиравусса ихтилат. Ца яла агьамсса мурадну кIицI лавгуна хасъсса аьралий операциялий гьуртту хъанахъиминнах ва миннал кулпатирттах аякьа даву.
Аьмну шанна ссят хьуна Республикалул бакIчинал Дагъусттаннал агьалинал ахIвал-хIал ххуй баврил ялув гъалгъа тIий.

Имара Саидова