Совещание дайдишин хьхьичI, ре­гистрация нанисса ппурттуву, бавтIцири жанахIраву ххал дуллай бия республикалий итадакьайсса дуклаки оьрчIансса дуки-хIачIия. Ва выставкалий 18 предприятиялул дуки-хIачIия дия: дикIулсса, накIлилсса, багъ-бахчардавасса, мукунна личIи-личIисса сокру. Дия ккаккиялун школ-лаххиягу.Совещаниялул дайдихьулий Аьрасатнал просвещениялул министр Сергей Кравцовлул видеообращениялий барча бувна бавтIцири, бувсуна билаятрай лябуккулий най душиву цIусса школарду ва садикру буллалисса даву. Ванал кIицI лавгуна гьашину 5-ми классирттахь дихьлантIишиву цIусса дарс «Духовно-нравственная культура России». Бувсуна цаймигу агьамсса цIушиннардая.
Хъирив махъ лавхъуна республикалул бакIчи (врио) Федор Щукиннул. Ванал чIурчIав дурна, республикалий оьрму цила ххуллий, сантирай нанаврил гьану хъанахъишиврий миллатру куннищал кув бавкьуну, нахIуну яхъанахъаву ва миллатирттал мазурдил, культуралул, аьдатирттал хIурмат лахъну бушиврий. КIицI лавгуна, школа хьун аьркиншиву тарбиялул центрну. Бувсуна 2027 шинал жагьилсса педагогтуран цал дулайсса выплата – 150 азарда къуруш дулавантIишиву, ялагу шиная шинайн ЕГЭ-рдал лахъсса баллу ласласисса выпускниктал ххи хъанай бушиву.
«Гьашину ЕГЭ-рдал хIасиллайн бувну, Дагъусттаннал 57 выпускникнал давурттан 100 балл бивхьуссар. Ва ккалли дувансса хьхьичIуннайшивур. МуницIухва, шагьрулий ягу зунттал кIанай личIи бакъа, дуккаврил даража гьаз бавриха зун аьркинссару. Дуккаврил качество гьаз дуван гъира бутан­сса ххуллурду ххал буллай бу­ссару, педагогтурал даврил кьимат лахъ хьунну. Ва мурадрайри жагьилсса учительтуран ца чIумух 150 азарда къуруш дулун ккаккан дурссагу. Ва ялагу, «Земский учитель» программалул лагрулий школардайн тIайла уккантIиссар 30 учитель, ца-ца миллион выплаталунгу буллуну», – увкунни Федор Щукиннул.
Цала ихтилат къуртал буллай, ванал цувагу учительтурал кулпатраву хъуна хьушиву, нину 50 шинай оьрус мазрал ва литературалул учительницану зий бивкIшиву кIицI лавгуна.
Аьрасатнал ПаччахIлугърал Думалул депутат НурбахIанд НурбахIандовлулгу кIицI лавгуна, школалул, кIулшивуртту дулаврицIун, оьрчIан пикри буван, пиша язи бугьаврил хIакъираву цалий бацIан лахьхьин буллан аьркиншиву, вай иширттаву учительнал хъунмасса бияла бушиву.
«ОьрчIан билаятрал тарихрал цIанихсса вакилтал кIулну бикIаврицIун, буттал кIанттулмигу кIулну бикIан аьркинссар. Гьарца чулуха итххявхсса, билаятрал ва республикалул тарих кIулсса, вирттаврая хавар бусса никри тарбия дуллан аьркинсса жура», – увкуна ванал.
Дагъусттаннал кIулшиву дулаврил ва элмулул министр (врио) ЯхIия Бучаевлул балжийну бувсуна 2025-2026 шиналсса дуккаврил хIасиллая. Профсоюзирттащал уртакьну цIакь бувшиву бувсуна учительнал харж ( оклад) МРОТ-раяр – 27093 къурушраяр лагьсса къабикIантIишиврул документ. Бувсуна щаллуну ремонт бувшиву кIулшиву дулаврил 42 объект, 1242 кабинет уттизаманнул оборудованиялул дузал бувшиву ва щинал мугьалтту бувксса ппурттуву зарал бивсса 130 учреждение цIу буккан бувшиву. Бувсуна цалчинмур классраву дуклакиминнан шардайнсса даву дулаву дукьан дуршиву ва сентябрьданул 1-нний байбишинтIишиву 37 садикрай ниттил мазурдийсса дарсру дихьлай. Ванал докладрая балжийну бусанну хъиривмур номерданий.
«Сферум» (ООО «ВК») идаралул каялувчи Рубен Акоповлул бувсуна дуккаврил процессраву айти-технологияртту сантирай ва лябуккулий ишла дуллалаврия.
Махъру лавхъуна кIулшиву дулаврил ва элмулул министрнал цалчинмур хъиривмур Аида ТIалхIатовал, ДИРО-лул ректор Гульнара АхIмадовал, «Движение Первых» дастталугърал правлениялул председательнал хъиривмур Соня Погосяннул.
ХьхьичIунсса педагогтуран дуллуна паччахIлугърал наградартту. Аьмну наградартту дуллуна 62 учительнан: вайннавух дуллуна «Заслуженный учитель Республики Дагестан» ва «Заслуженный работник образования Республики Дагестан» тIисса цIардугу, К.Д. Ушинскийл цIанийсса медальлу, «За верность профессии» тIисса хъазамрай лачIай лишанну.
Гъумучиял школалул лакку мазрал учительница, опыт бусса педагог Роза Бавасулаймановагу лайкь хьуна наградалун. Ванин дуллуна «Почетный работник сферы образования РФ» тIисса бусравсса цIа. Укуннасса цIа дуллуна ЦIуссалакрал гимназиялул учительница Умалаева Рабиятлун. «Дагъусттаннал образованиялул отличник» тIисса хъазамрай лачIай лишан дуллуминнавух бия ЧIяйннал школалул учительница Аминат Халилбагова. Дагъусттаннал КIулшиву дулаврил ва элмулул министерствалул чулухасса Барчаллагьрал чагъарданун лайкь хьуминнавух бия ЦIуссалакрал райондалул КIулшиву дулаврил управлениялул хъунмур Светлана Кудаевагу.
Ва совещаниялий гьуртту хьуна республикалул ХIукуматрал хъунама МахIаммад Рамазанов, МахIачкъалаллал мэрнал хъиривчу Нариман Батырбиев, КIулшиву дулаврил управлениялул хъунмур Шаганэ Баймурзаева. Бия лакрал шаннагу райондалиясса учительтурал делегациярттугу.