Майрал 16-нний Дагъусттаннал бакIчинал буржру чIумуйну биттур буллалисса Федор Щукин ивунни Дарбантуллал райондалийн, гъараллу ларчIун, щиная зараллу бивминначIан.
Ванащал архIал бия Аьрасатнал генеральный прокурорнал хъиривчув Сергей Бажутов, Дагъусттаннал ХIукуматрал председательнал буржру чIумуйну биттур буллалисса МахIаммад Рамазанов ва цаймигу къуллугъчитал.
Мамедкъалалив вай бивунни зарал бивминнан кумаг буллалисса, оьрчIал искусствардал школалул къатраву тIивтIусса штабрайн. Федор Щукиннул барчаллагь увкунни шикку зузиминнахь.
– Бивсса зараллу лахъаву – му агьаммур масъалар. Ва щаллу шаврил ххуллийсса давурттугу жура шайссаксса анавар дуккан дуллантIиссару. Барчаллагь зун дуллалисса даврихлу. Дуккан дувара му бакIуйн. Жулва аьмсса мурадри бала-апатIсса иширая бивсса зараллу бухлаган баву, – увкунни ванал.
Делегация бивунни щиная яла хъунмасса зарал бивсса Красноармейская кIичIиравун.
Дарбантуллал райондалул бакIчи Эльман Аллахвердиевлул бувсъсса куццуй, цIанасса чIумал къатрава щин дуккан дурну дур, ччаннай дацIан дуллай бур инфраструктура. Цува ивсса кIанттурдайсса агьалинащал Федор Щукиннул бунни ихтилатру, кIицI лавгунни кумаг къабувсса цучIав къаличIантIишиву.
ДакIнин бутанну кумаг аьркинминнал, цамур кIанайн бизан буванминнал сияхIру дурну душиву, щаллу буллай бушиву чара бакъа аьркинсса документру, цIусса къатравун инсантал бизан буван ккаккан дурну душиву 10 гектар аьрщарал. ХIакьинусса кьини ххал бивгьуну бур агьалинаясса 14 азарва аьрза. Федор Щукиннул кIицI лавгунни ва кIанай Мамедкъала цайми муниципалитетирттансса эбратну хъанай бушиву.
Ахирданий ванал каялувшиндаралу хьунни оператив штабрал заседание.
Бадрижамал Аьлиева
