Махъсса ппурттуву би­лаят­рал медициналувугу цIу­сса технологиярттацIун дар­хIу­ну хъуни-хъунисса хьхьи­чIуннайшивуртту хьунни. 

Республикалул диагностикалул центргу сантирай ва лябуккулий ишла дуллай бур искусственный интеллект (ИИ).
Диагностикалул давриву миннуя биялсса мюнпатгу бушиву кIицI лаглай бур Центрданул хъуними. БакIрал ва хъазамрал клеткалул компьютерная томография давриву, флюорографиялул ва маммографиялул давриву ишла дуллай бур вай ИИ.

Мукунна электрон журалул медициналул картардащал­сса давривугу. Диагноз дишин кIихIулла хъанахъисса иш бухьурча, цал анализ дуван вихшала дуллалиссар программалийн, яла хIакиннал – специалистнал гьарзат хIисавравун ларсун диагнозрал бази дуллалиссар. Ва ялагу, медициналул электрон журалул картардал анализ дуллай, ИИ-лул азар ялун личаврил прогнозгума дулайсса дур. ХIакинтураща яла чIумуй дайдишин хъанай дур му азар ппив хьун, оьнийн дуккан къаритансса терапия.
Ва проект бартдигьлагьиссар Дагъусттаннал ЦIуллушиву дуруччаврил министерствалул кабакьаврийну, «Активное долголетие» тIисса национал проектрал лагрулий.

 
Республикалийсса ФАП-ирттал, районнайсса ва шагьрурдайсса азарханардал ва Диагностический центрданул даву ца цифровая платформалийн дурцуну, дархIуну дуссар. Ва дахIавривугу ИИ-лул бияла хъунмассар, диагноз дишаврил даву ва медициналул хъиривлаявурттал хIасиллу чIун чIарах дуккан къариртун дуллали­ссар. Вагур мюнпатсса къулайшинна.
Аьмну кIицI лавгсса Центрданул дувайсса дур 800 журалул исследованияртту. Ца зурул мутталий дувайсса дур дянивну 1300 компьютерданул томография (КТ), 1381 МРТ, 78827 лабораториялул исследование, аьмну цинярда исследованияртту тIурчарив – 95572. Дур дяхтта утту бишин бувну хъин бувайсса стационаргу, микку зуруй 325 къашайшала хъин увайсса ур.

 
ПатIимат Рамазанова