Аьдатравун багьсса шамилчинсса аьрххи хьунни гьашинугу жул ГьунчIукьатIрал шяравун, машгьурсса альпинист, хIакьсса патриот Абусупияннул арс Зиябуттин ХIажимирзаевлул ужагърайн.

 Ххуллугу тIайлабацIусса хьуна, кьинирдугу дарусса дия. Гъараллу лачIлай зия хьуну бивкIсса ххуллурду чачун бакьин буллай бия. ТIабиаьтгу аргъирай щюллишиврувун дагьларгуну дия.
Цинявннан кIулсса зат бур ГьунчIукьатIрал шяравалу дунияллийх машгьур хьусса, цIанихсса аьлимтурал ва хьхьичIунсса пишакартурал шяравалу душиву. Уздансса тухумирттаясса Зиябуттин ва Валида ХIажимирзаевхъул цала ххаллилсса хасиятирттайну бусравну ва ххирану бур ГьунчIукьтIрал жяматран бакъассагу, республикалийгу, республикалул кьатIувсса хъамаллурангу. КIицI лаганна, Зиябуттин лакрал миллатрайн багьайсса гьарица иширттавух сахаватлувну гьуртту шайсса инсангу ушиву.

Хъамал ххирасса, хъамаллураха хIурмат-кьимат бан кIулсса Зиябуттиннул кулпат, утти лакку душваврал ккурандалулгу авадан бунни. ГьунчIукьатIрал шяраву бюхттулнив дурсса вайннал къатраву хъамал бакъасса чIун тачIав дакъар. Цала мажал бакъашиврух къаурувгуну, хъун къабивзуну, Зиябуттиннул къушлий вайксса инсанталгу кьамул бувну, цинявннаха аякьа-хIурматгу бувну, тIайла бувккунни ва ххуллухьгу. Вайннал ужагърай­сса лакку душваврал дуссух­сса миллатрал бучIантIимуний дакI цIуцIаву дуллалисса хаварду, дан-ританмуниясса пикри-хияллу, цIу бусса хъярч-махъсартту хъамакъабитайсса асардал бувцIусса бия.
Дюхлулсса гьавалий гьан­ттайн чIумал тачIавгу бизар къахьунсса бия Дагъусттаннал халкьуннал артисткахъал Загьидат Муслимовал ва Луиза Шахдиловал бюхханну учайсса балайрду. Ва аьр­ххилий хъиннува исват хъанай бия хъин-хъинсса сиптарду дусса, пагьму-гьунар бусса, хьхьичIун ливчусса душру-хъами жула бушиву.

Ва кьинисса хъамаллуравух бия ихтилатраву тIааьнсса, ккурандалуву хIурмат-кьи­матрайсса, пагьму-гьунар бусса душру: философиялул элмурдал доктор, ДГИ-лул профессор Асият Буттаева, Мариям Илиясовал цIанийсса «Дараччи» ихIсандалул фондрал президент Гульшан Хасаева, ДГТУ-лул кьатIаллил мазурдил кафедралул хъунмур, чичу, шаэр Жанна Абуева, А. Тахо-Годил цIанийсса Педагогикалул институтрал оьрус мазрал ва литературалул секторданул хъунмур элмийсса зузала, шаэр, литературовед, таржумачи Миясат Муслимова, Расул ХIамзатовлул цIанийсса миллатрал библиотекалул директорнал хъиривмур Сарат Жабраилова, Москавливсса «Дараччи» фондрал филиалданул хъунмур Басират Билалова, вирттаврал нину Саният ХIажиева, Дагъусттаннал магьирлугърал лайкь хьусса зузала, «Лезгинка» ансамбльданул хореографиялул школа-студиялул директор, балетмейстер ва хореограф Тарият Къапиева, Дагъусттаннал паччахIлугърал филармониялул директорнал хъиривмур София Разуева, Дагъусттаннал халкьуннал артисткахъул Загьидат Муслимова ва Луиза Шахдилова, «Дагестан» ГТРК-лул лакралмур редакциялул хъунмур, журналист Тамара Закарьяева, Дагъусттаннал халкьуннал шаэр ПатIимат Рамазанова, шаэр КьурбанпатIимат Штанчаева, ПатIимат МахIаммадова, «Илчилул» отделданул редактор Андриана Аьбдуллаева.
ГьунчIукьатIрал шяравун бу­чIайхту, жу чарабакъа бияйссару миллатран тачIав хъамакъабитайсса ЧIибил душ Мариям Илиясовал ва жула коллега Кьурбаисмяиллул арс Амин Аьбдуллаевлул къатрачIан, вай дакIнийн бичин, кьулгьу-алхIам буккин. Аьпа баннав цал, цикссагу чумартсса давуртту дурсса, дугърисса инсантал бикIайва.

КIицI лаганна, гьашинусса аьрххи авадансса ва барачатсса хьушивугу. Жун тIайлабацIу хьуна Гульшан Хасаевал сипталийн бувну, ЧIурттащиял шяраву тIитIлатIисса Буттал кIанттул цIанийсса Хъун дяъвилия зана къавхьуминнал, захIматрал фронтрай зий бивкIминнал, хасъсса аьра­лий операциялий чувшиврий жанну дуллуминнал аьпа абад буллалисса ххаллилсса мемориал комплексрал шадлугърайгу гьурттушинна дансса.

Аьрххилул асардая буслай, учивияв, Зиябуттиннул жул оьрмулуву ххари-хъиншиврул дурцIусса ца байран ххишала дунни куну. «Оьрмулуву тачIав хъамакъаританссар Зиябуттиннул ва Валидал къушлий бигьалаглай бивкIсса кьинирду», – тIий, барчаллагьрай бия вайннайн цинявппа хъамал.
ЦIуллушиву дулуннав, Зиябуттин вихьхьунгу, вил кулпатрахьхьунгу, оьрчIахьхьунгу. Барачат бишиннав ас-намус лавайсса зул къушлий.

Имара Саидова