МахIачкъала шагьрулул 49-мур школалул директор, каруннай бияврил спортрал мастер, универсал каратэлул спортрал мастер Айгунов Аьбдулкаримлул, Ватандалул мурадру буруччаву мурадрайсса хIукму кьамул бувну, хасъсса аьралий операциялий гьуртту хьун лавгун хъун хIал къавхьунни. Аьбдулкаримлул иширайну исват бунни цува Ватандалул хIакьсса патриот ушиву.
ЦIана ва ур «Центр» тIисса аьралуннал группалул батальондалул аьралий-политикалул даву дачин дурсса командирнал хъиривчуну зий. Аьбдулкарим увну ур 1984 шинал Лакрал райондалийсса Карашиял шяраву. Ва чIивинияцIава цимурца лахьхьин гъира бусса, хъинну итххявхсса оьрчI ивкIун ур. ХьхьичIунсса хIасиллай школагу къуртал бувну, дуклан увххун ур Дагъусттаннал паччахIлугърал университетравун.
Аьбдулкарим уссия СКФО-райсса ММА-лул Федерациялул председательну, Дагъусттаннал панкратиондалул спортрал хъунама тренерну. 2019 шинал Южно-Сухокумск шагьрулул администрациялул бакIчинал хъиривчуну, мунияр махъ Дагъусттаннал жагьилтурал иширттал министрнал кумагчину. Ванан яла дакIнил лавсмур тIурча, бур педагогнал пиша. Хасъсса аьралий операциялий гьуртту хьунсса кьутIи даннин Аьбдулкарим каялувшиву дуллай уссия азаллийхъайсса дуклаки оьрчIру бусса, МахIачкъала шагьрулул 49-мур школалий.
Украиннал аьрщарай хасъсса аьралий операция бачин бувния шинай ва цимилагу лавгссар Данецкаллал ва Луганскаллал Республикарттайн, Курскаллал ва Запорожскаллал областирдайн цала чулухасса гуманитар кумаг лавсун. Аьбдулкаримлул цува аьралитурачIан гуманитар кумаг лавсун лавгтари, тай ссах мюхтажну буссарив, ци аьркинну дуссарив кIул буллай, тIалавшиннарду дузал дуллай уссия. Аьралитуран кумаг баврихлу Аьбдулкарим лайкь хьуну ур «Каспий» батальондалул командованиялул, Дагъусттаннал бакIчинал, ДР-лул Национал политикалул министерствалул чулухасса наградарттан ва барчаллагьрал чагъардан.
– АцIнияхъайсса аьрххирду хьунни ттул хасъсса аьралий операция нанисса кIанттурдайн занай. Ттула яруннан ххал хьунни тийхсса тагьаргу, жула мюхчаншиву дуруччаврил цIаний аьралитурал буллалисса захIматгу. Вай аьрххирдайн заназиссаксса хIаллай, ттущагу къабювхъунни жула аьралитурая архну ацIан. Гьашину июнь зуруй Аьрасатнал обороналул министерствалущал кьутIигу дурну, ттула рахIатсса давугу кьариртун, жула аьралуннал кьюкьравух хIала увхра, – тIий ур Аьбдулкарим Айгунов.
КIицI лаганна, Аьбдулкарим школалий каялувшиву дуллалисса чIумалгу оьрчIру патриотъталну тарбия баву мурадрайсса хъуннасса даву дачин дурну ивкIшиву. МуницIун бавхIусса дур СВО-лийсса ванал «Патриот» тIисса позывнойгу. ХьхьичIунну дуклакисса оьрчIру ххари баву ва миннан дуккаврихсса гъира бутаву мурадрай, региондалул кьатIувсса республикарттайн ва цаймигу дакIний личIансса кIанттурдайн экскурсиярттай оьрчIру бувцуну лагайссия Аьбдулкарим. Цува каялувшиву дуллалисса школалий ччя-ччяни дайссия хьхьичIунсса чемпионтуращалсса ва бусравсса инсантуращалсса хьунабакьавуртту.
2025 шинал августрал 6-нний Аьбдулкарим гьуртту хьуссия Владимир Путиннул дуллалисса, цIуну бувсса школарду тIитIаврин хас дурсса видео-конференциялий. Шиккугу ванал цала сипталийн бувну Аьра­лий славалул музей ва трофейный класс тIитIин хIадур хъанай ушиву кIицI лавгссия. Цала бувсъсса махъру бачIвасса бакъашиву тасттикь бувну, вай давурттугу ванал ччясса мутталий дузрайн дуккан дурссар. Октябрьданий лахъа-хъунсса даражалий, бусравсса хъамаллурайнгу оьвкуну, школалий тIивтIуссар Аьралий славалул музей. Шиккусса чIяруми экспонатругу дур цува гуманитар кумагращал лавгсса чIумал хасъсса аьралий операция нани­сса кIанттурдая ларсун увкIсса. ХIакьинугу жаваблувсса къуллугърай зузисса ппурттувугу ванал даву бигьасса дакъар. Аьралитурал психологиялул тагьар, низам, мюхчаншиву дуруччаву, аьралий бигарду бартбигьин хIадур баврил ялув ацIаву дуллалисса дур.
Замполит цува каялувшиву дуллалисса аьралитуращал уссар хьхьичI ххуттайсса окопирттая тIайла хьуну, вай бусса гьарца кIанттурдай.
Уттигъанну цала батальондалувусса аьраличунал ппу къашай хьуну ушиву кIул шайхту, Аьбдулкарим цува командирначIан лавгун, ва цала нитти-буттачIан гьансса отпуск ласунсса кумаг бувну бур.
Батальондалуву аьралий политикалул даву дачин даву бакъассагу, цала спортралмур опытгу кIибачIлай ур.
Аьралитурал дянив буллай ур каруннах бияврил ва спортрал личIи-личIисса бяст-ччаллу. Цала лащу-щаллусса давугу кьариртун, Ватандалул мурадру буруччин лавгсса Аьбдулкарим Айгунов ва цинявппагу жула жагьилтал Заннал бурувччуну лякъиннав.

Никита Горщак ,
«Красная Звезда» кказит
ХIадур бурссар
Имара Саидовал