Дагъусттаннал паччахIлугърал университетрал юридический факультетраву хьунни юридический элмурдал доктор, профессор, Аьрасатнал элмурдал бусравсса ишккакку, Хъурхърал шяраватусса Астемиров Зайнуттин Астемирдул арс дунияллийн увккун 100 шин бартлагаврин хас дурсса щалагу Аьрасатнал элмий­сса конференция.

Ваний ххал бигьлай бия уголовный жаваблувшиндарайн ва танмихIрайн кIункIу баврил ттизаманнул буруккинтту.
Мероприятиялий гьуртту хьунни Аьрасатнал регионная­сса паччахIлугърал властьрал органнал, элмийсса ккураннал ва судрал системалул вакилтал.
Профессорнал оьрмулия ва ганал кьабивтсса элмулул ирсирая бувсунни ДГУ-лул ректор Муртазааьли Рабадановлул, ДР-лул юстициялул министр Мустапа Генжехановлул, Дагъустта­ннал Судьятурал советрал хъунмур Анжела Ибрагьимовал ва цайминнал.
Бусравсса хъамаллуравух ия Лакрал райондалул бакIчи Зураб Куччаевгу.
Цала учитель дакIнин утлай, ванал кIицI лавгунни Зайнуттин Астемиров ивкIшиву теоретический анализ даврицIун жапасса буруккинтту щаллу бан бюхъайсса ххуллурду лякъин кIулсса аьлимчу.

– Жун цинявннан профе­ссор Астемиров хьуссар Бу­ттал кIанттуйн ва элмулийн дакI тIайлашиврул эбратну. ЧIумул кьянатсса хIасратругу дурхIуну, ганаща бювхъуну бия буруччин цала пикрирду ва хIуччарду, дакIнил сахаватлувшиву ва даврихсса гьавас, – увкунни Зураб Куччаевлул. – Ва конференциялул исват буллай бур профессорнал аьпа бухкъалагантIишиву, ганал пикрирдал гьарцаннавун бутлай бушиву цIу-цIусса хъиривлаявуртту дуллансса гьавас».
Конференциялул лагрулий профессор, юстициялул министр Генжехановлул Астемировлул юбилейран хас дурсса награда –­ ве­домствалул ХIурматрал грамота дуллунни ДГУ-лул уголовный правалул ва криминологиялул кафедралул доцент Темирлан МахIаммадовлун.
Ва ларайсса наградалун Тамирлан МахIаммадов лайкь увну ур Юстициялул министерствалийн багьайсса мурадру чулийн бутан кабакьу буллай ушиврухлу. Тамирлан Гъумучатуссар, цувагу хъанахъиссар Лакрал райондалул депутат.
Ххариссару жула ватанлувнал захIматран лавайсса кьимат бищаврия.