Аьрасатнал Печатьрал кьини Дагъусттаннал ХIукуматрал хъунама Аьбдулмуслим Аьбдулмуслимовлул, Дагъусттаннал бакIчи Сергей Меликовлул цIанияту республикалул журналистътал, печатьрал зузалт барча буллай, хьхьичIунминнан паччахIлугърал наградартту дуллунни. Премьернащалсса хьунабакьаврийн Дусшиврул къатравун бавтIунни журналистикалул ветерантал, жагьилсса журналистътал, аьралий корреспондентътал, федерал изданиярттал ва личIи-личIисса СМИ-дал вакилтал.
Мероприятие дайдишин хьхьичI Аь.Аьбдулмуслимовлул фойелувусса луттирдал выставка ххал дунни. Журналистътал барча буллай, бувсунни республикалул оьрму, хъанахъисса ишру бусса куццуй, тIайлану ккаккан буван журналистътал хIарачат буллай бушиву, граждан позициягу чIалачIи бувну, агьалиначIан тIайласса информация чIумуй биян буллай бушиврул агьалинал СМИ-дайнсса вихшала цIакь дуллалишиву. Премьернал кIицI лавгунни, хаснува бигьану бакъашиву СВО-лийсса дагъусттаннал репортертуран, цала оьрмурдан нигьачIаву дунура, Буттал кIанттул цIанийсса Хъунмасса дяъвилул ппурттуву кунма, аьрай хъанахъисса иширттая агьалинахь буслай бушиву.
Аьбдулмуслим Аьбдулмуслимовлул дакIнин бувтунни, Аьрасатнал президентнал указрайн бувну, ялун дуркIсса шин Ватан дуруччайминнал шинну баян бувшиву. Дагъусттаннал луттирду итабакьай басмаханардал даврийн увккун, ванал хъинчулий кIицI лавгунни миллатирттал чичултрал луттирду итабакьлай бушиву «Дагъусттан» тIисса луттирду итабакьай къатрал ва республикалул издательствалул, Расул ХIамзатовлул, Фазу Аьлиевал, Сулайман Стальскийл юбилейрдал хьунийн 100 азарва экземпляр литературалул итабавкьушиву, республикалий 11-чин «Тарки-Тау» луттирдал фестиваль хьушиврулгу литературалул хIурмат хъун бувшиву ккаккан буллалишиву. Миллатирттал кказитру цачIун бувну, «Дагъусттан»Этномедиахолдинг хIасул дувавугу премьернал хъинчулий ккавккунни. Бувсунни цала миллатирттал кказитру ххилтIу бувайшиву.
«Миллатирттал кказитру, ниттил мазру ва культура ядуваву мурадрай хIасул дурсса Этномедиахолдинграл хъаттиралу цачIун шаврил ххуйсса хIасиллу чIалачIи дунни. Яручу ухьувкун, на буккара яру мазрайсса «ХIакъикъат» кказит, печатьрал качество хIисавравун ларсун, цIа дуван ччива даргиял «Замана» кказитрая. Миллатрал пресса ябаву агьамсса давур», – увкунни премьернал. Ванал наградартту дуллуминнавух бия лакгу. Дагъусттаннал ХIукуматрал ХIурматрал грамота дуллуни 10-ла СВО-лийн командировкалий лавгсса «НТВ» телекомпаниялул собкорр Оьмар МахIаммадовлун ва оператор Рабадан БахIаммадовлун. Оьмар МахIаммадовлул, грамота ласайхту, барчаллагь тIисса ихтилат буллай, увкунни: «Къабигьасса чIунну дуркIунни, амма на дакI дарцIуну ура, журналистътурал цехрал цайвасса бигарду лайкьну бартбигьинтIишиврий, 1999-ку шинал кунма, ва хIакьинусса кьинигу бартбигьлагьисса кунма. Жулва агьаммур мурад – агьалинан жулва аьрал цукун кьини лахълай буссарив ккаккан бавур. Ва гьашинусса шин, жуламиннал ххувшаву ларсун, СВО къуртал хьусса шин хьуннав!». Видеосвязьрайн бувккуна декабрьданул 29-нния шийнмай ирглийсса командировкалий Луганскалий зузисса «Цалчинмур каналданул» журналистътал ХIусайн ХIусайнов ва Фарид Муслимов. Аьбдулмуслим Аьбдулмуслимовлул вай барча буллай, «Зу – хIакьсса виртталлу!» увкунни.
ХIурматрал грамотартту ва Барчаллагьрал чагъарду буллунни телевидениялий, кказит-журналлай бюхъу буну зузисса журналистътуран.
ПатIимат Рамазанова
