Вай гьантрай Дагъусттаннал Шяраваллил хозяйствалул министерствалул бунни ппиринж бугьаву лядуккан даврил масъалартту ххал бигьаврин хасъсса республикалул семинар-совещание.
Мероприятие хьунни Къизлардал райондалул администрациялул къатраву.
Ваний гьуртту хьунни ДР-лул шяраваллил хозяйствалул министрнал цалчинма хъиривчу Шарип Шарипов, Ппиринжрал элмийсса федерал центрданул директор Сергей Гаркуша, ДР-лул Федерал аграрий центрданул директорнал чIумуйсса кIанайма Нариман Ниъматуллаев, Дагмелиоводхозрал директорнал цалчинма хъиривчу Бигиш Чаниев, Дагъусттаннал ва Чачаннал ппиринж бугьайсса районнал администрациярттал каялувчитал. БатIаврий ххал бивгьунни интту хъуру дугьаврил, хъузалт дишай щинал щаллушиврул, хъуру дугьавриву цIушиннарду ишла даврил масъалартту.
Ппиринжрал элмийсса федерал центрданул аьлимтурал гьартану бувсунни ппиринж бугьавриву дуккан дурсса цIушиннардал хIакъираву ва жавабру дуллунни хъузалтрал буллусса суаллахьхьун.
Шарип Шариповлул бувсунни ппиринж бугьаврил агротехникалул агьамшиврия ва Шяраваллил хозяйствалул министерствалул муних хъуннасса къулагъас дуллай бушиву, хьхьичIунсса практикарттащал хъузалт кIул буллайгу бушиву.
Ванал тIимунийну, мукунсса ххуллу язи бувгьуну бусса бур ппиринж бугьавривугу, мунияту паччахIлугърал кумаграйхчил Дагъусттаннай ппиринж бугьавриву тамансса хьхьичIуннайшиву хъанайгу дусса дур.
«Аьрасатнал Шяраваллил хозяйствалул министерствалул кумаграйну мелиорациялувугу хьхьичIуннайшиву хъанай дур: 2025 шинал анжагъ ппиринжрал инженер системартту жучIара дурну дур ва цIу дуккан дурну дур 3342 гектарданий – ми хъанай дур 2025 шинайминнуяр 2,5-ла ххишаласса», – увкунни Шарип Шариповлул.
Ванал мукунма кIицI бунни аьркинну душиву хъуруннавун дичин аьркинссаксса оьргъашиву, ишла буван лавайсса даражалул гьанна ва цила чIумал ккаккияртту ласун ЕФГИС ЗСН, ФГИС «Семеноводство» ва ФГИС «Зерно» цифралул информациялул системарттавун.
Ахирданийгу ванал бувсунни Дагъусттаннал Шяраваллил хозяйствалул министерствалул ният душиву шинал мутталий дуван цаппара мероприятияртту Федерал даражалул экспертътурайнгу оьвкуну.
ХI.Аьдилов
