Лакрал райондалий, Буршиял шяраваллил хьхьичI, Хъун неххал даралуву, августрал 17-нний дайдирхьунни «ПпабакIу» тIисса спортрал туризмалул фестиваль. Ва дикIантIиссар августрал 23-ннин. Фестивальданул цалчинмур кьини жугу хьуру шикку.

«ПпабакIу» фестивальданул сакиншинначитал бур Дагъусттан Республикалул Спортрал туризмалул федерация, Дагъусттан Республикалул Туризмалул ва халкьуннал сянатирттал министерство, Дагъусттан Республикалул Физическая культуралул ва спортрал министерство, Лакрал райондалул администрация.

Жу бувкIсса ппурттуву шикку бия фестивальданул сакиншинначитал, инструктортал, ххассалбувулт, волонтертал. Палаткарду бивщуну, гьарца кьинисса оьрмулуву чара бакъа аьркин хъанансса шартIру щаллу дуллай бия.

Жул хьунийн увксса Дагъусттаннал поисково-спасательный кьюкьлул цалчинмур классрал ххассалбуву, Спортрал туризмалул федерациялул вице-премьер, зунттал туризмалул инструктор-проводник, зунттал гид Сердер Эмирчубановлул жун ккаккан дунни чув ци дуссарив. Щюллисса цалчинмур палаткалуву – кухня, кIилчинмуниву – сайки нюжмардий диял хьунсса дуки-хIачIия, кIяламур палаткалуву – столовая, тинмай – къувтIи бичай зона. Лагмава – фестивальданул гьурттучитал уттубишинми палаткарду.

Сердер цува Лаккуйн фестиваль дайдишин 3-4 гьантлул хьхьичIва увкIун ия. Ххюлусматусса цала дустуращал увкIун ПпабакIу зунттучIан, бувну бия нех лахъансса ламу, ваниннин гужсса гъараллу ларчIсса чIумал неххал лавсмунин кIанай. Фестивальданиясса гихунмайсса жул ихтилатгу Сердердущал хьунни.

– Фестивальданул хъуннасса программа дуссар. Ванил гьурттучитал лахъантIиссар шанма зунттуйн: ПпабакIу (3397 м.), Балиал (4007 м.), Дулттидагъ (4127 м.). Вай маршрутирттайн буккантIиссар, жулва билаятрал яла хъуними шагьрурдая Москавлия ва Санкт-Петербурглия тIайла хьуну, щала Аьрасатнавасса гьурттучитал, мукунма жулла республикалиямигу. Цинявппагу – 130-нния ливчусса гьурттучитал. Пишакарсса, зунттайн лахълахъаврил, заназаврил хъунмасса опыт бумигу, инструкторталгу, зунттурду ххирану, вайннуйн лахъан ччай, амма цумур зунттуйн ва цукун, щищал лахъантIиссарив къакIулну бивкIун, укунсса аьрххилий цалчин буклакимигу. Укунминнан жу лахьхьин буллантIиссару спортрал туризмалул гьанурду, буслантIиссару зунттаву мюхчаншиву дуруччиншиврул дуван аьркинмуния, – буслай ур Сердер.

Гьурттучитурал мюхчан­шиву дуруччаву мурад­рай, шикку бикIантIиссар поисково-спасательный кьюкьлул группа ва пишакарсса инструктортал-проводниктал. Буршиял хьхьичIсса даралувугу, ПпабакIуйгу арвахI ва хамискьинирдай дикIантIиссар ххассалбувултрал группалущалсса вертолетгу. Зунттаву сотовая связь зий-къазий дикIавай тIий, щаллу дурну дур спутникралмур связь. Хьхьувай чани бикIан, ток бикIан ишла буллай бур генераторду.

Ва журалул фестиваль лув-ялув шанна шинай дурну дур ЦIумадиял райондалийсса Хунух тIисса шяравалличIасса неххал даралуву. Гьашину, маршрутгу, программагу даххана дурну, пикри бувну бур ва фестиваль Лаккуй дуван, яла лаккумур зунттун цIагу дирзун. Фестивальданий гьуртту хъанай бур блогертал-путешественникталгу.

Сердердул тIимунийн бувну, ва фестивальданул сакиншинначитурал хьхьичIсса агьамми мурадру бур спорт, спортрал туризм машгьур даву, зунттал территорияртту хьхьичIуннай даву, туризмрацIунсса площадкарду щаллу баву, шиккун туристътал ва инвестортал кIункIу баву, зунттал бакIайн тIайлану лахъан лахьхьин баву.

Гьунттий ПпабакIул чулухунмай бачинсса хIадуршинна дуллай вайгу кьабивтун, жу бавчуру ялавай.
«ПпабакIу» фестивальданийн наниминнащалсса микроавтобусру жун хьунабавкьунни Буршиял шяраваллицI, вайннал суратругу рищарду, зунттурдая бувчIун махъсса цала асарду жущала кIибачIинсса махъгу ласарду.
Фестивальдания гьарта-гьарзану бусанну хъиривмур номерданий.

Бадрижамал Аьлиева