МахIачкъалалив хьунни Национал гвардиялул вневедомстенный къаралданун 72 шин шаврин хас дурсса шадлугърал мероприятияртту. Шикку гьуртту хьунни Дагъусттаннал Росгвардиялул управлениялул хъунама, генерал-майор Александр Орехов, вневедоственный къаралданул зузалт ва ветерантал. Александр Ореховлул дурккунни Нацгвардиялул федерал къуллугърал директор, аьралуннал генерал Виктор Золотовлул чулухасса барча баву.
Ванал кIицI лавгунни вневедоственный къаралданул зузалтрал хъуннасса хъар лахълай бушиву республикалий низам ва мюхчаншиву дузал давриву, дуручлай бушиву паччахIлугърал ва агьалинал хъус, агьамшиву дусса объектру, талай бушиву тахсиркаршивурттащал.
– Практикалул чIалачIи буллалимунийн бувну, цалчин къачагътурайн данди бацIлай бур вневедомственный къаралданул зузалт. Цуксса къаччайнугу, къуллугърал зузалтран жанну дулун багьсса ишругу хъанай бур.
Аьпалухьхьун лавгсса гьалмахтал жущалва ца кьюкьлуву буссар, жунма дакIний буссаксса ми сагъну буссар, – увкунни ванал ва баян бунни миннал аьпалун минутIрайсса пахъ багьаву.
Дагъусттаннал Вневедомственный къаралданул управлениялул хъунама, полициялул полковник Оьмар НурбахIандовлул цала ихтилатраву кIицI лавгунни вневедомственный къарал ца яла хъунмамур ва техникалул дузалмур Росгвардиялул къуллугъ бушиву, тахсиркаршивурттащалсса талатавриву, ччимур журалул хъус дуручлай вайннал ишла дайшиву ттизаманнул ларайсса технологиялул кьяйдарду.
– ЧIярусса шиннардил лажиндарай вневедомственный къаралданул подразделениярттаву хIасул хьуссар ххуй-ххуйми аьдатру, салкьи хьуссар авадансса ва яргсса тарих, гьаз хьуссар зузалтрал пишакаршиврул даража, миннал чувшиврийну ххассал хьуссар захIматсса тагьарданувун багьсса инсантурал оьрмурду.
Цала яла ххуйми шинну вневедоственный къаралданул къуллугърай зий гьан дурсса, хIакьинусса кьинигу шаймур буллалисса ветерантурал захIматран багьа бакъассар. Ччива вайннал къуллугърал зузалтращалсса дахIаву руцан къариртун, жагьилми ватан ххирану тарбия баврил масъаларттаха зий, – увкунни Оьмар НурбахIандовлул. Къуллугърал зузалт пишалул байрандалущал барча буллалисса ихтилат бунни ветеран, отставкалийсса полициялул полковник Фикрет Пулатовлул.
Шадлугърал мероприятиялул лагрулий подразделениялул хьхьичIунсса зузалтран ва ветерантуран дуллунни ведомствалул чулухасса наградартту ва бахшишру.
Андриана Аьбдуллаева
