Декабрь зурул 24-нний 80 шин хьусса юбиляр, Дагъусттаннал ва Аьрасатнал лайкь хьусса художник Альберт Хаджаев барча уван ваначIан шаппай бувкIунни Дагъусттаннал культуралул министр Зарема Буттаева, Дагъусттаннал Художниктурал союзрал хъунама Кьурбанаьли МахIаммадов ва Дагъусттаннал изобразительный искусствардал музейрал хъунмур СалихIат ХIамзатова.
П. Рамазанова
[dropcap]З[/dropcap]арема Буттаевал кIицI лавгунни дунияллул художниктурал каталограйн цIа дагьсса Альберт Хаджаевлул усттарну дирхьусса суратирттал темарду чIярусса ва дюххансса душиву, циняв суратру дартIун, цалунмасса музей бувангу лайкь хьушиву, гьунар бусса художник ушивруцIун, луттирдал иллюстратор, искусствовед, преподаватель ушивугу. Кьурбанаьли МахIаммадовлулгу бувсунни Альберт уттисса никирал художниктуран эбратрансса ушиву гьарцагу ишираву. СалихIат ХIамзатовал кIицI лавгунни художник творчествалул аргъираву ушиву, ххуй-ххуйсса, цIусса суратирттайну уттигу агьали ххари буванссар тIисса умуд бушиву.
Дуллунни Альберт Хаджаевлун Культуралул министерствалул чулухасса ХIурматрал грамота ва бахшиш.
