Совет агьалинал фашизмалущалсса талатавриву ларъсса Ххувшаву хьуну дур XX-мур ттуршукулул иширттава ца яла агьаммур. Гьамин, ваниятур Ххувшаврил кьини жула билаятрай яла бюхттулмур ва хIурмат лаваймур байрандалун ккаллисса.

Лакраву тIурча, Ххувшаврил кьадру-кьимат лапва бюхттул­сса бур. ЧIивисса миллатрал дянива цайми миллатиртталнияр чIявусса чиваркI аьрайн лавгун, бачIи зана къавхьуну тIийгу, миллатрал аьдад хIисав дурну, яла гьарзасса вирттал жула лакрал миллатрава бувккун буну тIийгу бухьунссар жучIава Ватандалухлу жанну дуллуминнал аьпалул ва Ххувшаврил байрандалул хIурмат бюхттулсса.

ЧIявусса агьлугу бувкIун, сий лахъну хьунни Гъумуксса Ххувшаврил парад ва байрандалул шадлугъру. ЛачIлачIисса лайсал гъарах къабурувгун, кIюрххицIунна датIлан диркIуна Гъумучиял паччахI-ххуллийн лакрал ххюягу Виричуналссагу, Ватан душманная дуручлай бивкIсса тта­ттахъалссагу суратру, транспорантру, тIутIал кацIру кIунттихьсса дуклаки оьрчIал дасттарду. Баллай бия дяъвилул шиннардил балайрдугу.

Парад дайдишин хьхьичI Лакрал райондалул бакIчи ­Зураб Куччаев, ДР-лул Халкьуннал Мажлисрал депутат Марат Илиясов, 1-мур ранграл капитан Геннадий Кьурбанов шагьрурдая бувкIсса хъамаллуращал, райондалул администрациялул ва идарарттал зузалтращал ­Совет ­Союзрал ва Аьрасатнал Вирттаврал аьпалул чIирачIан бувкIун, тIутIив дирхьуна. ЧIира бувссар 2015 шинал Ххувшаврил 70 шинал хьунийн, 1975 шинал Гъумучиял школа къуртал був­сса чиваркIуннал сипталийну ва харжлухрацIух.
Шичча Вирттаврал аллеялийн лавгун, гьарцагу Виричунал суратрацI дирхьуна тIутIив. ДакIнин бутанну, 2020 шинал Гъумучиял паркрал паччахI-ххуллул чулийнмайсса чIирайн лахъан дурссия Буттал КIанттул цIанийсса Хъун дяъвилий Виричунал цIуртти лавсъсса ряхцIала дагъусттанчунал сурат.
Хъирив тIутIив дирхьуна Жагьилтурал паркрачIа бацIан бувсса Совет Союзрал Виричу Якьуб Сулаймановлул бюстрацI.
Муния махъ, дяъвилун бувсса кумаграхлу паччахIлугърал Обороналул комитетрал райондалун тапшур бувсса ЯтIул Ттугълищал ва Совет Союзрал Вирттаврал – АхIмад-Хан Султаннул, Ризван Сулаймановлул, ХIажи Бугъановлул, Якьуб Сулаймановлул, ЦIаххай Маккаевлул суратирттащалсса чIавааьралийтал хьхьичIну зюннав-дачIулущалсса парадрал кьюкьа дуркIуна дяъвилия зана къавхьуминнах дацIан дурсса гьайкалданучIан. Кьюкьлувуминнал кIунттихь дия Хъун дяъвилий талай бивкIсса цала гъанчунал суратру.

Дяъвилул шиннардил гьавас ягин буллай бия парадрал кьюкьлул хьхьичI нанисса ­аьралий техникалул. Бия ­Катюшава – хасну Парадрайн бу­ккан бантIий, февральданийва байбивхьуну магьирлугърал зузалтрал цала кашилуцIух ва гужирацIух бавтIсса. Пикрилул автор ия жула Нажвадин Халилов. Магьирлугърал зузалтрал гьайкалдануцI тIутIал шалкригу бивхьуну, дайдирхьуна митинг. Ватан душманная дуручлай жанну дуллуминнал аьпалул хIурматран буттал аьрщарайн бувкIцириннахь барчаллагьгу куну, махъ лавхъуна Зураб Куччаевлул:
– Ва байрандалул цинявппагу аьрасатлувтал цачIун буллалиссар Ватандалул цIаний чувшиврий жан дуллусса гьарца солдатнахсса ва фашизм дух даврил ххуллий жард къакуну бавцIуну, дяъвилул къинттуллух захIмат буллай, билаят ччаннай бацIан бувминнахсса дакIнийхтунусса ччаврил ва пахрулул асардал.
Лакрал райондалия аьрайн лавгун ур 6000 чув, вайннава 1500 цала хушрай, 3200 ливчIун ур дяъвилул цIараву. ЧIивисса лакрал миллатрава увккун ур ххюя Совет Союзрал Виричу. Щалла дунияллун машгьур хьуссар 1-мур ЦIувкIуллал шярава­сса АхIмад-Хан Султан. Цувгу дяъви нанисса мутталий ряхттуршлий кIийла гьаз хьуну ур ссавнийн. Гьуртту хьуну ур 150 гьаваллавусса талатавриву. Зувира цалалу, ацIния урчIра цайми летчиктуращал ххит дурну дур душманнал самолетру. Махъра-махъмур – Берлиннай.
Лакрал райондалия шамуннал ларсун дур Виричунал цIа – Ризван Сулаймановлул, ХIажи Бугъановлул, Якьуб ­Сулаймановлул.
Ххувшаву ласавриву хъунмасса кIану бувгьуссар ЗахIматрал дяъвилий гьуртту хьуминналгу. Ккаши бувхIуну, цалла дусса хъус-хъиншивуртту дяъвилун тIайла дуклай – 14 миллион къурушрал тIайла дуркссар. Дяъвилун бувсса кумаграхлу Лакрал район лув-ялув мукьийлла лайкь хьуссар СССР-данул Совнаркомрал чулухасса Занази ЯтIул Ттугълин ва лув-ялув шамийлла – паччахIлугърал Обороналул комитетрал чулухасса Занази ЯтIул Ттугълин, цуппагу яла абадлий ливчIссар райондалухь. Вана хIакьинугу ва Ттугъ жула шадлугъ чIюлу дуллай.

ХIурмат бусса ватанлувтал!
Ппухълуннал виричушивурттал ва захIматрал эбратрай тарбия дуллан аьркинссару жува хъирив нанисса ник, жувура рухI-ссихI дуссаксса тайннал аьпагу буручлай, жула билаятрал виричусса тарихраягу пахрулий.
Жула ватанлувтал хIакьинугу жард къакуну талай бур хасъсса аьралий операциялий. Цуксса хIайпнугу, кьинилия кьинилийн лахъи дурккун най дур Ватандалул ххуллий жанну дуллусса вирттаврал кьюкьа. Лакрал миллатрава хIакьинунин увккун ур ххюя СВО-лул Аьрасатнал Виричу: НурмахIаммад ХIажимахIаммадов, Фархад Худайнатов, Шамил МахIаммадов, МахIаммад Исбакиев (ливтIуну махъ) ва Сухраб АхIмадов ва хIакьинугу аьралуннай каялувшиву дуллай ур). Мунищала архIал баллай бур аьралий мурадру биттур буллай, бюхттул­сса пишакаршиву ва Аьрасатнал аьскарнал язими хасиятру ккаккан дуллалисса солдатнал ва хIаписартурал цIарду», – увку­нни Зураб Куччаевлул.

Дяъвилия зана къавхьуми­ннал рухIирдая кьулгьу-алхIам бувккунни Лакрал райондалул имамтурал хъунама ХIабиб Батталовлул.
Аьралий комиссар Аьли ГъазимахIаммадовлул бувсунни Хъун дяъвилий Лакрал райондалул чиваркIуннал дурсса гьурттушиндарая ва виричушивурттая.
ПаччахIлугърал наградартту дуллунни СВО-лул гьурттучитуран: «За отвагу» медаль – ватандалул ххуллий чувшиврий жан дуллусса Амаев Саэд Сулайманнул арснал ссийхьхьун, Жуковлул медаль хасъсса аьралий операциялий кIусса щаву дирну увкIсса Аьлиев МухIаммад Вагьабуттиннул арснан.
Ихтилатру бунни Геннадий Кьурбановлул, Кьубиял школалул директор МахIаммад Ссунгъуровлул, СВО-лул суаллалсса буллалисса райондалул бакIчинал кумагчи Ярагъи Дандамаевлул, Хъун дяъвилул гьурттучинал арс Аслан Къажлаевлул, захIматрал ветеран Сулайман Сулаймановлул.
Дуклаки оьрчIал дурккунни назмурду.
Парадрая махъ магьирлугърал къатлул зузалтралгу, Гъумучиял ОьрчIал магьирлугърал школалул тарбиялувтуралгу ккаккан дунни аьралий темалун, Ххувшаврин ва ватандалун хас бувсса балайрдал ва къавтIавурттал программа. Хьунни дучри ххяххан баврил ва спортрал бяст-ччаллу.

Зулайхат Тахакьаева