Бувну бур Альбина 1974-ку шинал Буршиял шяравасса Гирейл ва ЧIурттащатусса Аьт1икатлул кулпатраву. МахIачкъалаллал 29-мур школагу лавайсса кьиматирттай къуртал бувну, бувххун бур Дагъусттаннал университетрал тарихрал факультетрайн. Му къуртал байхту, 1996-ку шинал зун бивкIун бур МахIачкъалаллал 5-мур лицейраву тарихрал ва обществознаниелул учительну. 2004-ку шинал «Дагэнерголул» генеральный директор ХIамзат МахIаммадовичлул цивппа заллусса Гуманитар гимназия тIивтIусса чIумал, шикку зунсса ххуйсса пишакартал ххал буллай, Дагъусттаннал КIулшивуртту дулаврил министерстволийхчин Альбинайн бувккун ур. 2012 шинайннин Альбина ва гимназиялий учительну ва библиотекалул заведующийну зий бивкIун бур. 2012-ку шинал бувкIун бур ЛяличIисса гьунар бусса оьрчIансса чIяру профиллу дусса Республикалул лицей-интернатрайн. Шикку, цила дарсру дишаврицIун, тарихрал кафедралул хъунмурнугу бивтун бур. 2019-ку шинал ванийн тапшур бувну бур завучнал къуллугъ. 2021-ку шиная байбивхьуну ва бур лицейрал директорну. Альбина бур Дагъусттаннал тарихрал ва обществознаниелул учительтурал ассоциациялул каялувчигу. Пишалул ххуллий ванил лайкь дурну дур цикссагу грамотартту ва Барчаллагьрал чагъарду. Цила даву ххирасса лавайсса даражалул пишакар, жаваблувсса каялувчи Альбина Гиреевнал хIурмат хъунмасса бур дуклаки оьрчIачIа ва вайннал нитти-буттачIа.
Альбина бур ДР-лул КIулшивуртту дулаврил лайкь хьусса зузала.

ЛяличIисса гьунар бусса оьрчIансса Республикалул лицей-интернатрая, шиккусса оьрчIал ва учительтурал ккаккиярттая къабавсса нажагьсса бухьунссар. Махъсса шиннардий лицейрай каялувшиву дуллай бур шиккува тарихрал дарсирал учительну ва завучну зий бивкIсса жула лаккудуш Шутунова Альбина Гиреевна. Ванил сипталий ва каялувшиндаралу интернатрай чIярусса ххуй чулиннайсса дахханашивуртту хьушиврия буслай бур шикку зузими ва дуклакими. Республикалул кIулшивуртту дулаврил сфералувугу ва хIурматлувсса ва бусравсса зузалан ккаллину бур. Вай гьантрай ттул ихтилат хьунни Альбина Гиреевнащал.
– Альбинай, буси вила каялувшиндаралусса лицей-интернатрая, зула ккаккиярттая.

– ЧIяру профильлу дусса Республикалул лицей-интернатрал гьану бивзун бур 1986-ку шинал. ЦIубутIуй ва республикалул районнаясса оьрчIан тIий тIивтIуну бивкIссар. ХIалли-хIаллих тIий, тIивтIуссар шагьрулул оьрчIансса классругу. ХIакьину жучIа шагьрулиями оьрчIру чIявусса бур районная бувкIминнаяр. ЦIанасса чIумал лицейраву дуклай буссар 1220 оьрчI. Миннава 70 оьрчI бур районная ва цайми шагьрурдая бувкIсса, шиккува интернатрай ялапар хъанахъисса. Лицейраву дуклансса оьрчIру конкурсрал гьанулий язи бугьайссар. ЖучIан дуклан бучIайссар 7-мур классрава байбивхьуну. ОьрчIру дуклай буссар личIи-личIисса профильлай: технологиялул, гуманитар ва естественно-научный. Технологиялул профиль ххишаласса къулагъасрайн ласун хIарачат буллай буру.

Му мурадрай гьашину тIитIарду инженертурал классру. 7-мур класс­рал инженертурал группалувун заназисса оьрчIру Технологиялул колледжравусса дарсирдайнгу лагайссар, гьарта-гьарзасса кIулшивуртту ласаву мурадрай. Вайннан булайссар ЭВМ-рал оператортурал свидетельство. 10-мур классравусса инженертурал группалувуми лагайссар Университетрал информатикалул факультетрайсса дарсирдайн. ХьхьичIсса дачIи шинай вайннал лархьхьуссар цалчинмур курсрал студентътурал программа. Лицейрал икьрал дуссар сий дусса Москавуллал физикалул ва математикалул институтращал хIала-гьурттуну зунсса. Мунил лагрулий вай гьантрай жул оьрчIру гьантIиссар Ингушетиянавун Ухссавнил Ккавкказуллал физикалул ва математикалул олимпиадалий гьуртту хьун.
Вайми профильлайгу хъуннасса даву дуллай буру. Даврил ккаккиярттугу ххуйсса дур.
Лицейрал оьрчIру лагай­ссар Пятигорскалийн «Игры разума» тIисса интеллектуалту­рал конкурсрай гьуртту хьун. КIурссану цалчинсса кIану бувгьуну бувкIссия, дукIу кIил­чинсса бувгьунни. «Шаг в будущее» тIисса Щалагу Аьрасатнал конкурсрайгу жул ученицал хьхьичIунсса кIану бувгьунни. «Наука юношей питает» тIисса элмулул ва ахттаршиннардал конкурсрай лицейрал оьрчIру финалданувун багьунни. Гьарица шинах олимпиадарттай гьуртту хъанахъиминналгу, хьхьичIунсса кIанттурду бувгьуминналгу чулуха жул лицей хьхьичI ххуттай буссар.

Сайки гьарица шинах бикIай­ссар лицейраву медалистътал.
Яла кIулшивуртту думи студентътал зул выпускниктал бикIай, ми жучIанма бухлай ччива тIий, лицейращал хIала-гьурттуну зунсса икьрал дан увкIун ия Дагъусттаннал медициналул университетрал ректор Висампаша Ханаьлиев. Миннал оьвчай лицейрал оьрчIайн цачIарасса элмийсса конференциярттайн ва цаймигу мероприятиярттайн. Миччасса преподавательтал ва студентътал жучIангу бучIай профориентациялул даву дан. Уттигъанну 4-мур курсрал студентътурал актовый залдануву мониторданийгу ккаккан буллай, лицейрал дуклаки оьрчIан ккаккан бунни аппендицитрай операция байсса куц. ОьрчIругу, учительталгу, тамаша бувну, буруглай бивкIру.
Лицейравусса шартIругу, шикку дуллалисса кIулши­вурттугу чIалай, оьрчIан ва нитти-буттан жучIа дуклан ччай бур, амма, кIанттурду бакъашиврийн бувну, жуща циняв кьамул бан къашай, яла итххявхми, яла хьхьичIунми язи бугьлан багьай. Школа 370 инсаннансса бур, жучIарив цикссагу ххишаласса бур, цивппагу — циняв ца сменалий дуклакисса, цанчирчан кIилчинмур сменалий оьрчIругу, учительталгу зий буссар ххишаласса кIулшивуртту ласавриха. ЕГЭ-рдал, олимпиадарттал ва конкурсирдал хIасиллайн бувну жул лицейрал республикалий цалчинсса кIану бугьлай бур. Билаятрал яла сий думи вузирдавун бухлахисса выпускниктурал чулуха кIилчинсса шинни жул лицей щалагу Ухссавнил Ккавкказуллал Федерал округрай цалчинсса ххуттай. Щалагу Аьрасатнал дуклаки оьрчIал олимпиадалий гьуртту хьусса оьрчIал чулуха Ухссавнил Ккавкказуллал Федерал округрай хьхьичI ххуттайсса школа хIисаврай жу лайкь хьуссару олимпиадалул каялувчи, Москавуллал ПаччахIлугърал университетрал ректор Садовничийл чулухасса Барчаллагьрал ча­гъарданун. Ва сий дусса олимпиадар. Шиккусса хIасиллайн бувну, дуклаки оьрчIаща билаятрал ччимур вузравун буххан шайссар экзаменну къадуллуна. Гьашину лицей бувхссар инженертурал кIулшивуртту куртI дайсса Дунияллул халкьуннал дянивсса консорциумравун. Ва хъинну сий дусса организацияр. Шивун бухлахиссар щалагу Аьра­сатнал ва Гъанми билаятирттал технологиялул ххуллийх нанисса школарду. Ванил Центр буссар Санкт-Петербурглив. Партнертал хъанай бур щалагу билаятрал технологиялул вузру, хъунисса, цIа дурксса Аьра­сатнал корпорациярду: Росатом, Роскосмос, Газпром, Ро­ссети ва м.ц. Апрель зуруй на гьантIиссара Калининградрайн миннащал кьутIи дан. Муниннингу оьрчIру гьуртту хъанай буссар миннал дуллалисса мероприятиярттай, конкурсирдай. Укунсса кIанттурдай оьрчIру сий дусса вузирдал итталун багьлай бур, миннайн цачIава дуклан оьвтIий бур. Вузирдаву тIурча, миннах къулагъас дуллай бур иш бавчусса корпорациярду, оьвтIий бур цачIанма зун. Мунияту хьунни вайннащал хIала-гьурттуну зунсса икьрал дансса пикригу.

– Цукун язи бугьайссар лицейраву дуклансса оьрчIру? Щил бищай­ссар миннал гьунарданун кьимат? Бурив зучIа дуклай лакрал районная­сса оьрчIру?
– Лицейраву дуклансса оьрчIру жу конкурсрал гьанулий язи бугьайссар. Ми республикалул олимпиадарттай, личIи-личIисса конкурсирдай ххув хьусса бикIан аьркинссар. Лицейраву дуклан ччисса оьрчIал миннуй гьуртту хьунсса аьрза булайссар жул сайтрайн. Чара бакъа дикIайссар оьрус мазрал, математикалул, мукунна профильданул олимпиадартту. Щалагу республикалия бучIай миннуй гьуртту хьун ччисса оьрчI­ру.

Технологиялул профильданий дуклан ччиминнан ду­ссар «Фатон» тIисса физикалул ва математикалул олимпиада, естественно-научный профиль язи дугьлагьиминнан – «Гиппократ» тIисса, гуманитартуран – «Ника» тIисса. Ми олимпиадарттал чIалачIи бай куртIсса кIулшивуртту дусса оьрчIру. ОьрчIал гьунарданун кьимат бищайссар хасъсса, щийнкIуй хъар бакъасса жюрилул.
Буссар лицейраву дуклакиминнаву лакрал шаннагу райондалияссагу оьрчIру.

– Циксса учительтал зий бур хIакьинусса кьини зул лицейраву?
– ЦIанасса чIумал жучIа зий ур 84 учитель. Хъинну бавкьу­сса, куртIсса кIулшивурттугу, зунсса гъирагу бусса, цала давугу ххирасса учительтал бу­ссар лицейраву зий. Шикку так мукунссаннащар зун шайсса. Мигу жу конкурсрал гьанулийри кьамул байсса. Махъсса шиннардий потенциал, гъира-гьавас бусса жагьилсса учительтал буцин хIарачат буллан бикIара. ХIакьину мукунсса чIун дур, жагьилсса учительнан школалий зун ччай бушиврия ххари хъанан багьлагьисса. Бигьану ба­къар хIакьину физикалул, математикалул пишакартал лякъин. Ца жучIара дакъассагу, щалагу билаятрай дур му тагьар.
ЧIявуми жул учительтал лицей тIивтIуния шихунмай зузисса бур.Чансса бакъар шикку зузиминнаву лицейрал выпускникталгу. Гьашину кьамул бав Дагъусттаннал университетрал филологиялул факультетрал магистратуралуву дуклакисса жула выпускница. Ва ххуйну дуклакисса, хIарачат бусса душ буссия. Жунгу бигьану бикIай лицейрал низам, тIалавшиннарду ва аьдатру кIулсса вайннащал зун. Мукунсса 15 учитель уссар хIакьину жучIа. Лицейрал учительтал цинявппагу лавайсса даражалул пишакарталли, личIи-личIисса региондалул, билаятрал конкурсирттай ххув хьусса. ХьхьичIунсса пишакартал хIисаврай вайннайн оьвчайссар дарсру дишин «Альтаир» тIисса оьрчIал гьунарду итххяххан байсса центрданийн. На навагу бивкIссара ва Центрданий ххюра шинай зий. Ва дахьва тIивтIусса чIумал, гьунар бусса оьрчIащалсса даврил опыт бу­сса, методика кIулсса преподавательтал аьркин багьлай буну, КIулшивуртту дулаврил министерство жуйн бувккуна. Сайки циняв дарсирдал учительтал жул лицейравасса бивкIссар. Мукунма дуклакимигу. Нава зузисса чIумал ца жул ученик Щалагу Аьрасатнал тарихрал олимпиадалул ахир ятапрайн агьссар. Каялувчи ва учитель хIисаврай на мунащал Мордовиянавун, Саранск шагьрулийн, лавгссияв. ДакIнийн бутан, ва Аьрасатнал Президентнал сипталий Сочи шагьрулий тIивтIусса «Сириусрал» региондалийсса вакилхана хъанахъиссар

Жул лицейрал учительтал битайссар ЕГЭ-рдал комиссиялул председательталну, республикалул чIяруми конкурсирдал, олимпиадарттал жюрилуву. Гьуртту шайссар республикалул личIи-личIисса грантирттай. Ларгсса шинал, «Дагъусттаннал яла хьхьичIунма учитель» конкурсрай гьуртту хьуну, арула жул учительнал ларсъссар грант. Дагъусттаннал бакIчинал грант ларсъссар физикалул учительнал ва ца ученикнал.

Лицейрал учительтал лагайссар Дагъусттаннал КIул­шивурттал даража гьаз баврил институтравун (ДИРО), курсирдайн бувкIсса учительтуран мастер-классру ккаккан бан. Цал-цал миннайн шиккунма, лицейравунгу, оьвчайссар. Жул учительтал мукунма лагай­ссар районнал школардайн, учительтуран методикалул чулуха­сса кумаг баву мурадрай. Ттулагу дахIаву дуссар кIулшивуртту дулаврил чулуха цахъис махъун багьлагьисса школардал директортуращал. Жущава шайсса кумаг буллай буру.
Учительтурал харжру мюрщисса бушиврия тIий бур. На учивияв, кIулшивуртту дусса учительнаща хIакьину школалий зийгу ххуйсса харж ласлан бюхълай бур. Цала дарсирдацIун, ххишаласса кIулшивуртту дулаврил даву дачин дурну, проектирдай, грантирттаву гьуртту хьуну. Шиккува кIицI лаган, жагьил­сса учительтуран жучIа 20%- рал надбавка дуссар.

– Альбина Гиреевна, буси лицейраву, ххишаласса кIулшивуртту дулаву мурадрай, цукунсса давурттив дуллай буссарив.
– НукIува кIицI лавгсса куццуй, ххишаласса кIулшивуртту дулаврил даву лицейраву дарс­­ру къуртал хьуну махъ, кIилчинмур сменалий, дуллай буссар. ОьрчIан ххишаласса кIулшивуртту дулаврия жучIава махъсса шиннардий гъалгъа тIун бивкIунни. Жул лицейравурив ва даву чIярусса шиннардил хьхьичIра дуллай бивкIссар. Муниятур шикку дуклан ччиссагу мудан чIявусса бивкIсса. Ца гьунар бусса инсаннаву гьарица чулухасса гьунар бикIайссар учайхха, жучIа оьрчIавусса циняв гьунарду итххяххан буллали­сса, хъиннува ялун личин буллалисса система нирхиравун дагьну дуссар.
Жул буссар жула театр, Рес­публикалул Поэзиялул театрданущал, Лакрал театрданущал хIала-гьурттуну зузи­сса. Пушкиннул карталий цала постановкарттащал жучIан бучIайссар Лакрал театр. ЧIун-чIумуй жу оьвчайссар жучIанма Фаина Графченкойн. Вай гьантрайгу дикIантIиссар мунищал­сса хьунабакьаву. Жул лицейравур шайсса «Живая классика» тIисса, щалагу Аьрасатнава­сса ва Гъанми билаятирттая­сса оьрчIал дянивсса конкурсрал региондалул ятап. Ца жул ученик ва конкурсрай ххув хьуну Москавлив лавгссар. Конкурсрал жюрилуву бикIайссар цIанихсса артистътал, чичулт, культуралул ишккаккулт.

Гьарица шинах лицейраву шайссар республикалул гуманитар конференция. ХьхьичIва конференциялий так преподавательтал гьуртту шайссия, гьашину дуклаки оьрчIругу кIункIу барду. Пикри буссар ялунчIин, чIаххуврайсса регионнал вакилтурайнгу оьвкуну, Ухссавнил Ккавкказуллал даражалий дансса.
Дуссар лицейрал «Орфей» тIисса ххаллилсса вокально-инструментальный ансамбль. Ххуйну дирхьуну дуссар спортрал даву. Дуссар жула баскетболданул команда, цимилагу республикалул соревнованиярттай ххув хьусса. Ва Аьрасатнал школардал баскетболданул лигалувун кьамул дурссар. Дуссар оьрчIал ва душваврал волейболданул командартту, гьарица шинах республикалул соревнованиярттай хьхьичIунсса кIанттурду бугьайсса, мукунна футболданул лига. Буссар настольный теннисрал, куклу атлетикалул, шахматирттал секциярду. ЛичIи-личIисса бяст-ччаллаву хьхьичIунсса ккаккияртту чIалачIи дайссар лицейрал шахматистътурал, хIатта секция тIивтIуну дахьра шанна шин хьуну дунугу.

Вай гьантрай жучIа дикIан­тIиссар патриот балайлул конкурс. Ва мудангу лахъа-хъунну, байрандалул даражалий лагай­ссар.
Аьдатравун дагьну дуссар гьарица шинах ца-ца класс ца-ца конкурсрай гьуртту шаву. Масала, патриот балайлул конкурсраву — 7-мур класс, «Точь-в-точь» тIисса машгьурсса артистътуран дуллалисса конкурсраву – 8 класс. Тамашасса иш, вай конкурсирдаву оьрчIал мудангу совет заманнул артистътал ва совет заманнул балайрду язи бувгьуну бикIай.

9-ми классру гьуртту шай­ссар «Мусил ссут» конкурсрай, 10-ми — строевой хIадур­шиннаралссаннуй. Строевой хIадуршиннарал конкурс дай­ссар Ххувшаврил кьинилун хасну, шагьрулул, республикалул военкоматирттал вакилтурайнгу, Хъун дяъвилул, СВО-лул гьур­ттучитурайнгу оьвкуну. Хъунма­сса барчаллагьри оьрчIал нитти-буттайн циняв жура дуллалисса мероприятиярттал чIарав ххуйну бацIайсса.
– Цукунсса шартIру дуссар шиккува общежитиелий ялапар хъанахъиминнан?
– Нава лицейрал директорну битайхтува общежитиелувуминнан къулайсса шартIру дузал дуллай байбивхьура. Дарду ремонт, даххана дарду мебель. Автомат-машинартту ва сушилкарду бивхьуну, щаллу бував янна шюшинсса къатта. На каялувчину бацIаннин интернатрайминнан гьантлун шамийлла дуллай бия дукра. Утти гьантлун ххюйлла дуллалиссар, кIира нюжмардийсса менюгу дурну. Гьарица группалун ккаккан увну уссар кIи-кIия тарбиячи. Жуйнма тапшур бувсса, нитти-буттая архсса оьрчIал ялув жу хъинну бацIайссару. Ва хъуннасса жаваблувшиннар. ЦIана ва оьрмулувусса оьрчIан захIматсса чIун дур. Ци-цигу ишру хъанай бур. КIучI къабанна, гьар мудан уттубишайхту Заннайн дуаь дуллан бикIара, оьккимуния буруччи тIий.
Шинай кIийлла, районная бучIан бувну, нитти-буттащал собрание дайссар.

– Вийва бияла буну цукунсса дахханашивуртту дан ччива лицейраву?
– ХьхьичIра-хьхьичI, лицейрал къатри гьарта-гьарза давияв. ОьрчIру чIявусса бур, кабинетру биялну бакъар, къумашиву дур. Складру бивкIсса кIива къатлуя кабинетру бував, мунийнугу масъала щаллу къавхьунни. ХIисав да инара, 370 инсаннансса кIанттурдай 1220 инсан ур. Азарунния ливчусса оьрчIру бусса чIумал кIива сменалий дуклан аьркинссар. Журив ца сменалий буру. Нава директорну бацIаннинма, тагьар чIалай, ци-бунугу чаран лякъин аьркиннихха тIий, директорнахь ва учительтурахь маслихIат бувссия грантрай гьуртту хьун. Му ппурттуву информациялул технологиярттацIун ва робототехникалуцIун дархIусса 6 миллиондалунсса Щалагу Аьра­сатнал грант баян бувну бия. Ай, балики, куну, таваккулгу бувтун, сакин бувну зунсса группагу, байбивхьуру. ТIайлабацIу хьуну, ларсъссар жу грант. Ми арцух лицейрал ремонтгу дарду, гьарица аьркинсса оборудованиегу ларсун, робототехникалул кабинетгу тIитIарду. Му дузал шайхту, технологиялул группардавасса оьрчIахь робототехникалул дарсругу дихьлан бивкIру.

Ларсъссар жу ца цамургу Аьра­сатнал грант. «Сберкампус» тIисса Сбербанкрал конкурсрай ххув хьуну, 300 азарда къуруш дурххуссар. Миннухгу лицейран аьркинсса кьай-кьуй ларсъссар. Ларгсса шинал ласарду мини-типографиялунсса оборудование. Ччай бур преподавательтурал каялувшиндаралу оьрчIал лицейрал журнал итабакьлай, жучIара журналистикалул профильгу духьувкун. КIанттурду бакъа, зузи бан хъанай бакъару. ЦIусса корпусру аьркинну бур. КIанттул ссуссукьушиннарайн бувну, чIярусса мюнпатсса проектирдая ма­хъаллил хьун багьлай бур.
Ялагу, ттул хиял бур лицейравун 5-мур классрава байбивхьуну кьамул буллан. Пикри буссия, 7-ми классру чан бувну, 5-ми классирттавун кьамул буллансса, къавхьунни. ЧIявусса жучIанма 7-нивун бачин хIадур хьусса оьрчIан ххуллу лакьин най бия. 2024-2025-ку шиннардий, ци чулийгу, му масъала щаллу бан хIарачат банна. Бюхъарча, ттун гьарица школалийн кунма, 1-мур классрава байбивхьуну занай ччива жучIанмагу оьрчIру. ХIайп, цалсса хъанай бакъар.
– Альбина Гиреевнай, буси вила кулпатраягу.
– На бувну бура учительтурал кулпатраву. Мичча нанисса бухьунссар ттул оьрчIнияцIавасса кIулшивурттахсса гъирагу, учительнал пишалухсса ччавугу. Школалийн гьаннинма лавхьхьуна ттун буккин-чичин. Хиял бикIайва учитель хьун­сса. ОьрчIнийсса ттул циняв тIуркIурду нава учительсса бикIайва. Ттуярва мюрщимигу бавтIун, гъирарай дарсру дихьлан бикIайссияв. Танийсса «ттул учениктал» уттигума дакIнийн бутлан бикIай, ина бувтунни жувун дуккаврихсса гъира тIий. Ттун нава учительнал пишалий бакъа чIалан къабикIайвав. 28 шин хьуну дур ттул ва пишалий зий. ХIакьинусса кьинигу дарс дишаврия неъмат ласара.
Ттул 3 оьрчI бур. Душнил къуртал бунни Дагъусттаннал медициналул университет, зий бур роддомрай. Хъунама арс дуклай ур Дагъусттаннал университетрал юридий факультетрал магистратуралуву. Зий ур Энергосбытрал идаралий юристну. ЧIивима арс 6-мур классраву дуклай ур.
Ттул лас чIярусса шиннардий уссия ЗахIматрал инспекциялул хъунаманал хъиривчуну. ЦIана зий ур Капитал-Инвест компаниялий.

– Ци учин ччива, ихтилат къуртал буллай?
– Ттул дакI ххарину дикIай гьунар бусса, итххявхсса жула оьрчIая, ххари хъанан бикIара ми билаятрал сий дусса вузирдавун бувххун, миккугу цала даража ккаккан буллай бушиврия, минная тIалавсса лавай­сса даражалул пишакартал хъанай бушиврия. ЖучIа буссар цикссагу личIи-личIисса вузирдал каялувчитурая бувкIсса жула выпускниктурахь барчаллагь тIисса чагъарду. ХIайп тIун бикIара жула ххуйсса пишакартал Дагъусттаннай бацIлай бакъашиврий, миннал бюхъугу, кIулшивурттугу дагъусттанлувтурал ишла дуллай бакъашиврий. Жул выпускниктал чIявуми Аьрасатнал хъуни­сса шагьрурдайх бур. Бур дазул кьатIувссагу.
Чув бухьурчагу Заннал бурувччуну лякъиннав.

Р.S. Вай гьантрай Альбина Гиреевнал кIицI ларгунни оьр­мулул юбилей. Барчагу буллай, чIа тIий буру цIуллушиву, дуллалимуниву тIайлабацIу, зун­сса гъирагу, шавкьгу. Заннал кабавкьуну, дакIнийсса цинявппагу мурадру бартлаганнав.
Ихтилат бувссар
Андриана Аьбдуллаевал