Цалчинмур ЦIувкIратусса пагьламан Камил Маммаевлул проектрал хьхьичIунсса кIану бувгьуну бур щалвагу билаятрал «Аьрасатнал аьрщарал захIматчитурал династиярду» тIисса конкурсрай.

Ва Президентнал грантирдал фондрал ва Аьрасатнал Нитти-буттахъал национал ассоциациялул уртакьну хIасул дурсса конкурс дур. Ва конкурсрайн гьан дурсса ряхттуршра материалданува язи дургьусса зувиллий ряххуннивух дур Камиллул проект «ТаразалучIансса ххуллу. Аьра­сатнал аьрщарал захIматрал династия – Пагьламантал».

Вай хьхьичIунми материаллу цачIун дурсса лу итабавкьуну бур. Хъинникьай, гьамин Кулпатрал шинал ва хьхьичIуншивугу! Камиллул балжину бувсун бур цалва оьрмулул ххуллия, пагьламаншиву язи дугьариврия, цала тухумраву вара даврихун багьминная. ДакIнин бутанну, Камил пагьламантурал династиялиясса ушиву, цувагу ряххилчинмур никирайсса пагьламан хъанай ушиву.

«Ттигъанну кIул хьунни жулла ниттил нину Сабират РСФСР-данул халкьуннал артист Ярагъи ХIажикьурбановлул хъинирву хъанай бушивугу. Жул агьулданийгу циняв хьхьуттайх ла­хъайсса бия, ттатта МахIаммад оьрмулухун хIалтIилий лагай­сса инсан ия пагьламантуращал архIал, Оьмар ттатта Индиянаву душнищал ччаллий хьхьуттайх лахълай унува, хъап куну душгу каруннийн гьаз бувну хьхьуттайх лавхъушиву.

Ттунна индиянал кинорду циван ххирассарвав тIун икIайссияв вакссара гужну, Оьмар ттатталгу, хьхьичIвами жулва агьулдания­сса пагьламантуралгу чIу баллай бакъарив тай заманнава.

Навагу ттуйнува нава хьусса пагьламанна, ряхра шинай таразагу дургьуну хьхьу­ттайн гьаз хьуссара, утти оьрчIан хьхьуттайх лахъан ла­хьхьин буллалисса преподавательну ура, нава авторсса методика дуссар хьхьуттайх лахъан лахьхьин буллалисса. Гьарманан, лахьхьин гъира буманан, зуву думанан лахьхьин буллай ура», – тIий ур Камил. Ванал мурад – пагьламаншиву машгьур давур, цалагу хIайран бувну тамашачиталгу, цаймигу хIайран буллан кIункIу бувавур. ТIайлабацIу баннав!

ПатIимат Рамазанова