Вай гьантрай Ккурккуллал шяраву шадлугърал даражалий тIивтIунни оьрчIру бигьалагайсса ва цIуллу-сагъшиву цIакь дайсса «Горный» тIисса лагерь.

ОьрчIру ва нину-ппу ва ххарисса иширащал барча буллалисса ихтилат бувна лагерьданул хъунама, Ккурккуллал школалул директор Кьурбан Гъужиевлул. Ванал оьвчаву дурна оьрчIайн шиккусса чIун бигьалаган ва мюнпатсса иширттан ишла дан.
ОьрчIру лагерь тIитIаврищал барча буллалисса ихтилат бувна райондалул КIулшивуртту дулаврил управлениялул хъунама М. Аьлишаевлулгу.
– На дакI дарцIуну ура шикку зу зулла цIуллу-сагъшиву, куннал куннащалсса дусшиву цIакь дантIишиврий, буттал улклул тарих куртIну кIул бантIишиврий, караматсса тIабиаьтрай хIаз ласуншиврий, – увкуна ванал.

Лагерьданийсса оьрчIащал учительтурал ва тарбиячитурал дуллай бур личIи-личIисса мероприятияртту.
Лавайсса даражалий кIицI ларгуна оьруснал шаэр А.С. Пушкиннун хас дурсса вечер. ОьрчIал дурккуна назмурду, ккаккан бувна шаэрнал произведениярттавасса парчри. Мукунна лахъа-хъунну кIицI ларгуна Аьрасатнал кьини. ЦIана тарбиячитурал каялувшиннаралу оьрчIру хIадур хъанай бур «Движение Первых» тIисса Аьра­сатнал оьрчIал ва жагьилтурал (РДДМ) суккушинна сакин хьусса кьини кIицI дан.
ХIакьину «Горный» лагерьданий игьалаглай ур 25 дуклаки оьрчI.
Умуд бур лагерьданийсса гьант­ри вайннан мюнпатну гьан­ссар тIисса.

Андриана Аьбдуллаева