Цуссалакрал райондалийсса Чапаево шяравасса Оьмаровхъал кулпат гьуртту хьуну, бувкIунни июльданул 7-10-нний Саранск шагьрулий хьусса «Родные – любимые» тIисса цIанилусса Щалагу Аьрасатнал кулпатирттал фестиваль-форумрай.

 Ва фестивальданий ряхва оьрчIащал (чIина-чIивиманан 2 шин) гьуртту хьунни педагогтурал кулпат ХIусайн ва Зара Оьмаровхъул.
Саранскалийн нани ххуллий Оьмаровхъал кулпат бивунни Москавливсса ЯтIул майданнивгу. Шикку вайннал ххал дунни Мининнул ва Пожарскийл гьайкаллу, КремлилучIасса мемориалгу, ккавккунни Абадлийсса цIарачIа ХIурматрал къаралгу. «Аьрххи цава, ххуллу кIива» тIисса куццуй, оьрчIан билаятрал тарихрая, Ватандалул вирттаврая гьарта-гьарзану кIул хьунссагу сант ххишала хьунни.
Саранскалий Оьмаровхъал кулпат чялишну хIала бувххунни форумрал программалувух. Шикку вайннал ххал бунни С.Д. Эрьзил цIанийсса Мордовиянал Республикалул изобразительный искусствалул музей ва ­Аьралий ва захIматрал гьунардал мемориалданул музей. Хаснува вайннан дакIний лирчIунни ­Аьрасатнал Виричу Артур Орловлущалсса хьунабакьаву.
Форумрай шадлугърал даражалий тIивтIунни июльданул 8-нний кIицI лагайсса Кулпатрал, ччаврил ва дакI тIайлашиврул кьини. Ва кьинигу Оьмаровхъал кулпатраву хIурмат-кьиматрай кIицI лагайсса дур. Июльданул 8-нний увну ур вайннал чIивима арс МахIаммад. Форумрал сакиншинначитурал, МахIаммад увсса кьини барча дуллай, пиш-каш дунни ванан уттизаманнул ссят.
Фестивальданий Оьмаровхъал ккаккан дунни кулпатрал гимн. Бувсунни учительнал пиша язи бувгьусса нитти-буттая, кулпатраву кьиматрай думуния, Дагъусттаннал халкьуннал аьдат-эбадатирттая. Форумрай гьуртту хъанахъисса кулпатирттащалсса дусшиврийсса ихтилатру, балайрду, къавтIавуртту хьунни тачIав хъамакъаритансса.
Оьмаровхъал «визитный карточкану» хьунни вайннал оьрчIал ларсун бувкIсса сувенирду. Хъунмур душ Фатимал щюллисса, някIсса. ятIулсса жанграй щавщун бия Дагъусттаннал ттугъ. Цала каруннах дурсса сувенирду пиш-каш дунни вайннал цIуну хьусса дустуран. Оьмаровхъан хъамакъабитулунгу дуллунни чIярусса бахшишру.
Имара Саидова