Новый Хушетуллал шяраву ххассалбувултрал къуртал дунни газонакопительданул станциялий ларчIун диркIсса цIарал биян бувсса зараллу бухлаган баврицIунсса давуртту. Пишакартурал 25 кубометра газрал авария хьусса цистерналува бувтIунни цамур лагрулувун. ПIякь учаврил хьхьичIалу кьувкьунни.
Тагьар цалийн дурцуну махъ ялапарлувтал зана хьунни цала къатравун. Тикку давуртту дуллалисса чIумал инсантал чIумуйнусса бивтун бивкIссар кIанттул школалий, миннан аьркинсса шартIругу дузал дурну.
ДакIнин бутанну, февральданул 16-нний, дяхтта, станциялул территориялий цIу ларчIун диркIун дур хьюмусса газ бусса цистерналуцIух. Му ишираву оьрмулуцIа хьуссар ца инсан. Дагъусттаннал бакIчи Сергей Меликовлул хьусса иширал хIакъираву увкуну бур «пример вопиющей халатности». Хъирив лавну кIул бувну бур га объектрачIа къадиркIшиву лицензия дусса идаралущалсса бала-апатIраща ххассал баврил хIакъиравусса договор. Тикку бивкIун бур газращалсса 50 цистерна.
Компаниялул залуннал вакилтал тиккун къабувкIун бур та иш хьусса чIумал. Меликовлул ихтиярду дуруччай органнайн тапшур бувну бур циняв тахсирлувтал кIул буван. Ванал тIимунийну, ччяни цIу лачIайсса затру ядаврил кьяйдарду лиян дурсса жаваблувсса инсантал танмихIрайн кIункIу бантIий бур, миннал статусрахгу къабурувгун.
Тагьарданул ялув бавцIуну бивкIссар МахIачкъалаллал мэр Жамбулат Салавов бакIчисса оператив штаб ва республикалул бакIчи.

ХI.Аьдилов