Ларгсса нюжмардий ДР-лул КIулшивуртту дулаврил ва элмулул министерствалул сайтрай хъиривмур дуккаврил шинал республикалул школардай дихьлахьисса ниттил мазурдил дарсирдал хIакъираву кьамул дан хIадур дурсса проект дишаврищал хъунмасса аваза гьаз хьунни социал сетирдавугу, муния бавсса, ниттил мазурдиха зузисса, пишакартурал дянивугу. Проектрая бавминнал дянив аваза гьаз шаврий аьйгу дакъар, цанчирча, мунил автортурал тIимунийн бувну, хъиривмур дуккаврил шинал ниттил мазрал ва литературалул дарсру факультатив дарсру хIисаврай дихьлан хIукму бан ччай бусса бур. Гьарнан бувчIусса куццуй, ниттил мазурдил дарсирдан кIанай школардай вайми дарсирдахми къулагъас хъун дан ччай бусса бур.

Залму АьбдурахIманова
Министерствалул сайтрай ттигу кьамул дан дурасса проектращалгу кIул хьуну, муний цивппа хъинну къарязишиву баян бан хъиривмур кьини Дагъусттаннал миллатирттал мазурдиха зузисса ца­ппара сакиншиннардал вакилтурал ДР-лул Чичултрал союзрал къат­раву бавтIунни КIулшивуртту дулаврил ва элмулул министерствалул, Аь.Тахо-Годил цIанийсса Дагъусттаннал педагогикалул институтрал пишакартал ва журналистътал гьурттусса «ккуркки стол». Шикку вайннал гьаз бунни, аьлимтал-лингвистътурал дагьай­сса къулагъасгу, аякьагу цIана къадарча, цаппара шиннардива дагъусттаннал мазру бухлаган бюхъайсса нигьачIишиву душиврия бусласи­сса муданмасса масъала. Сакиншиннардил вакилтурал тикрал бувунни проект цукунчIав Дагъусттаннал школардай кьамул дан къарязишиву ва чIявумиллатру яхъана­хъисса республикалий укунсса журалул проектру щурущи даврия хъунмасса зарал бушиву.
КIулшивуртту дулаврил министерствалиясса пишакартурал цала чулуха ххи бувунни проект ттигу кьамул дан дурашиву ва кIицI бувунни аьмну цIана Дагъусттаннал школардай ниттил мазран ва литературалун ккаккан дурну душиву 356 ссят. Агарда проект кьамул дарча, дарсирдал 50% чан хьун тIий бусса бур.
БатIаврий гьуртту хьусса ДНИИП-рал пишакартурал бусаврийну, укунсса проект кьамул дуварча, «жангу, рухIгу цалла дарсирдаву дирхьусса» ниттил мазурдил дарсирдал учительтурал ттинин бивхьусса захIматрал сий яларай дагьантIиссар. Ни­ттил мазру факультатив дарсирдан хIисав дарча, миннул бусравгу ялавай багьну, чIявуми нитти-бутталгу, дуклаки оьрчIалгу, школардал каялувчитуралгу ккалли-сан къадуллантIиссар.
Министерствалул пишакартурал укун тIимунийн жавабран тикрал бувунни, цал проектрай тIимур къатIайлану лалавсшиву, цив ниттил мазрал дарсру факультатив дарсирдайн кIура даен дан най къабивкIшиву.
ЦIана школардай щурущисса проект дусса куццуй ка къарщуну ритаврия ци буссар тIисса суалданун вайннаща жаваб дулун къабювхъунни.
Министерствалул пишакартурал цаятурасса аьй лиххан дан проектравун ларсун дур ниттил мазрал дарсру къадишаврия цан личIишиву дакъар тIисса цаппара нитти-буттахъал сиптагу. Министерствалул пишакартурал бусаврийну, вайннал республикалул шагьрурдал, районнал цаппара школардай дуклаки оьрчIал нитти-буттахъал дянив анонимсса цIуххаву дурну махъ хIукму хьуну бур цIусса журалул проект ххал дигьин. «Проект сайтрай дишин хьхьичI му Тахо-Годил цIанийсса Дагъусттаннал педагогикалул институтрал пишакартуращал цачIуну цан ххал къадиргьуссар?» тIисса суалданун дулунсса жаваб Министерствалул дакъая.
БатIаврил ахирданий Министерствалул пишакартурал баян бувунни сайтрая проект дукьлакьишиву ва шиккува ДНИИП-рал пишакартурахь тавакъю бувунни ччя­сса чIумул мутталий Дагъусттаннал школардай дихьлахьисса ниттил мазурдил дарсирдан зарал къабиянсса куццуйсса проект ххал дигьин.
Шиккура циняв гьурттучитурал цIания ДР-лул кIулшивуртту дулаврил ва элмулул министр Шагь­аьппас Шагьовлуйн ниттил мазрал дарсру дуруччаврил хIакъиравусса лабизаву дуллалисса резолюциягу чирчунни.