Февраль зурул 17-нний ЦIуминалийсса АхIмад Давдиевлул цIанийсса ТIюхчардал 1-мур школалий хьунни Ниттил мазрал кьинилун хас дурсса ва Аьрасатнал Халкьуннал цашиврул шин тIитIлатIисса шадлугърал мероприятие.
Байрандалун лавхьхьуну чIюлу бувну бия школалул зал. ЧIирттайн лархъун дия лакрал чичултрал ва шаэртурал суратру, тIиртIуну дия миннал луттирдал выставка. Ккаккиялун дирхьуну дия нукIурасса, жула халкьуннал ишла дуллай бивкIсса тIахIникIичIу ва цаймигу кьай-кьуй.ТIивтIуну бия миллатирттал дукрардал авадансса ссупра. Цинявппагу дуклаки оьрчIру бия миллатирттал янналуву.
Мероприятие тIитIлай, ихтилат бунни школалул директор ЩайхахIмад Дадаевлул. Ванал бувсунни Ниттил мазрал кьинилул тарихрая, чIурчIав дунни ниттил мазрал инсаннал оьрмулуву агьамсса кIану бугьлагьишиврий.
– ХIакьинусса байран – хъуннасса мяъна дусса байранни, ва жула Ниттил мазрал кьинир. Ниттил мазрал кьини кIицI лагайссар щалагу дунияллий. Ва цIакь дурссар 1999-ку шинал ЮНЕСКО-лул хIукмулийну, миллатирттал мазру ва культура ядаврил масъалалух ххишаласса къулагъас даву мурадрай. КIицI дуллан бивкIссар ниттил мазрал байран 2000-ку шиная байбивхьуну, февраль зурул 21-нний.
ХIакьинусса кьини, миллатирттал мазру бухлагаврил масъала хьхьичI ххуттайн лавсъсса масъаларттавасса ца бур. БувчIлачIисса зат бур, маз бакъахьурча, миллатгу бакъашиву, миллат миллатну личIаншиврул, мунил культурагу, аьдатругу яхьуншиврул маз ябан аьркиншиву. Миллатирттал мазру ябаврил масъалалух махъсса шиннардий властьрал органналгу хъуннасса къулагъас дуллай бур. Кьамул дуллай бур личIи-личIисса программартту, проектру. Жулвагу, гьарица инсаннал, нитти-буттал, учительтурал, жяматрал бияла хъунмассар жула маз ябан, – увкунни ванал.
Лакку мазрал учительтурал ва дуклаки оьрчIал бувккунни оьрус мазрайсса ва лакку мазрайсса шеърирду, ккаккан дунни къавтIавуртту. ТIюхчардал школалий дуклай бур яруссаннал, даргиял, къумукьнал миллатирттал оьрчIругу. Минналгу дурккунни цала мазурдийсса назмурду. КIицI лаган, ниттил маз ябаву, муних гъира бутаву мурадрайсса давуртту ТIюхчардал школалий байрандалул гьантрай дакъассагу, щаллагу шинал лажиндарай дуллай буссар.
