Дагъусттаннал Росгвардиялул управлениялул зузалтрал ва МахIачкъалаллал соединениялул аьралийтурал барча бунни къуллугърал ва аьралий бурж бартбигьлай жанну дуллусса даврил уртакьтурал нинухъру ва щахъами.
Росгвардиялул управлениялул хъунаманал хъиривчу полковник Башир Алимов хьунаавкьунни къуллугърал бурж бартбигьлай жанну дуллусса кIанттул органнал зузалтрал ниттихъащал ва щахъаннищал. Дагъусттаннал Росгвардиялул управлениялул хъунама, полковник Вадим Кузнецовлул цIания хIаписарнал барчаллагь увкунни цила бикIайкунсса къучагътал тарбия бувсса ниттихъахь, чIа увкунни ссавур ва цIуллушиву. ХIаписарнал буллунни ниттихъан ва хъаннин тIутIал кацIру ва бахшишру.
Хасавюртуллал районнал дянивсса отделданул зузалт бувкIунни ва кьини милицанал майор Даитбек Вазирхановлул ва полициялул сержант ХIусайн Маккашариповлул щахъами барча бан. Дарбантлив Росгвардиялул зузалт бивунни полициялул хъунама сержант Агаверди Агавердиевлул ниттичIан ва полициялул майор Равил Таймуровлул щарссаничIан. МахIачкъалалив управлениялул зузалтрал барча дунни полициялул лейтенант Рустам Салиевлул нину, Къизилюртуллал вневедомственный къаралданул отделданул зузалтрал – милицанал чIивима сержант МахIаммад Аьлиевлул ва хъунама сержант Оьмар Исрапиловлул нинухъру.
Мукунма къуллугърал бурж бартбигьлай жанну дуллусса даврил уртакьтурал ниттихъачIан ва щахъанничIан бивунни МахIачкъалаллал соединениялул хасъсса моторизованный полкрал аьралийтал.
Росгвардиялул зузалтрал кIицI лавгунни чувшиврий жанну дуллусса зузалтрал кулпатру цанма тачIав хъамакъабитантIишиву ва миннах аякьа даву ведомствалул хьхьичI ххуттайн лавсъсса масъаларттавасса ца бушиву.
Андриана Аьбдуллаева