Хъаннил байрандалул гьантрай Дагъусттаннал ХIукуматрал лахъа-хъун бунни личIи-личIисса сферардаву чIярусса шиннардий зий хъунмасса захIмат бивхьусса хъами-душру. Бия миннавух жула лаккудушругу. Дагъусттаннал ХIукуматрал чулухасса наградарттан лайкь хьусса культуралул зузалтравух бия Хъювхъиял шяраваллил Культуралул къатлул филиалданул каялувчи Оьмаева Рукьижат ХIасаннул душгу.
Пишалул ххуллий бивхьусса захIматрахлу ва ккаккиярттахлу Дагъусттаннал ХIукуматрал председатель Аьбдулмуслим Аьбдулмуслимовлул дуллунни ванин ХIурматрал грамота.
Сайки ххюцIалла шин дурну дур Рукьижатлул культуралул сфералуву зий. 1979-ку шинал бувкIун бур ва Хъювхъиял шяраваллил Культуралул къатлувун художествалул каялувчину. Шикку зий бунува, 1990-ку шинал бувххун бур МахIачкъалаливсса Культпросветучилищалувун. Ва къуртал бувну махъ, 1993-ку шинал, бивтун бур директорну. ХIакьинусса кьинигу шикку зий бур. Шяраваллил жяматгу, дуклаки оьрчIругу лагма лаган бувну, Рукьижатлул лавайсса даражалий кIицI лагай цумурцагу байран. Ванил каялувшиндаралусса цинярдагу мероприятияртту ххуйну хIадур дурсса, дакIний личIансса шай. Рукьижат бур цила даву ххирасса ва жаваблувсса зузала. Аьчухсса, хIал бавкьусса Рукьижат ххирар шяраваллил жяматрангу, ванил хIурмат бур каялувчитурачIагу. ДакIнийхтуну барча тIий буру Рукьижатлухь лайкьсса награда. Уттиния тихунмайгу, чIярусса шиннардий, му винна ххирасса даврий зунсса гъира-гьавас буну личIаннав.
Андриана Аьбдуллаева