Ларгсса нюжмардий Москавлив, Поклон-Зунттуй, гьар шинах зума итадакьиннин батIайсса Рамазан зурул чятирдануву Дагъусттаннал кьини дунни. Ванил сиптачиталну ва сакиншинначиталну бия Аьрасатнал президентнал Дагъусттаннал Постпредство.
Республикалул бакIчи Сергей Меликовлул цIанияту бавтIцири барча буллай, Постпреднал хъиривчу ХIажимурад Къажлаевлул дурккунни Меликовлул телеграмма.
«Зумаритавал зурул чятир – личIи-личIисса диннал ва миллатирттал агьали цачIун батIайсса социал проектри, ванил агьамшиву хъиннура ярг хъанай дур гьашину, Аьрасатнал Халкьуннал цашиврул шинну баян бувнугу бухьувкун. Дагъусттаннал Муфтиятрал ЦФО-лул вакил МухIаммад Дибирдадаевлул барчаллагь увкунни Постпред Владислав Толстюклухь ва ванал командалухь диндалул мероприятиярттах мудангу къулагъас душиврухлу.
Дагъусттаннал муфтинал цIанияту циняв барча бунни Муфтиятрал хъунама Мурад Исмяиловлул. Ванал кIицI лавгунни, зумаритавал барз Кьуран ливксса, агьалинал дакIру марцI дувансса сант дуллалисса чIун душиву.
Бусурманнал агьлу цивппа чув бухьурчангу, чил хIурмат буну, цалламунил кьадру буну къуццу тIий бушиврия ва мукунгу бикIан аьркиншиврия, исламрал дин – хъиншиврул, ххуймунил ххуллийсса дин душиврия бия Москавуллал Бусурманнал рувхIаний управлениялул хъунаманал хъиривчу Марат-Хазрат Арслановлул ва цаймигу хъамаллурал ихтилатру.
Мероприятиялий гьуртту хьунни Москавливсса Дагъусттаннал Культуралул центрданул вакилтал ва Мариян Илиясовал цIанийсса «Дараччи» фондрал душру. Устаз Саэд Апаннинал кIива томрал заллу хьунсса тIайлабацIу хьунни ПатIиматлун. «ТачIав лотореялий цичIар дурххусса инсан бакъара, амма хасну укунсса мероприятиялий тIайлабацIу шаврия ххарину бура. Циняв душру цачIу-чIарав щябивкIун бухьувкун, ва аьмсса бахшишри. Куннал куннахсса ччавугу, хIурматгу куннан кув бувчIлачIавугу, чIаравманахасса аякьагу ххи даннав, ва ифтарданул барачат цинявннайн бияннав!» – увкунни ПатIиматлул.
Мероприятиялул ца яла агьаммур ххуйшиву дия Совет Союзрал Виричу, летчик-космонавт, дунияллий ца яла машгьурма ва хьхьичIунма дагъусттанчунан, Муса Маннаровлул хас дурсса даву душиву.
«Гьаксса цува Муса Маннаровгу гьуртту хьуну ччай буссияв, цахъис къашавай уну, чIявусса халкь бавтIсса кIанттайн укканну акъашиву бувсунни. Жула лайкьсса Виричу, жула миллатрал яргсса ва язисса арс агьалинан цал уттигу дакIнин утансса мурад щаллу хьунни лайкьсса даражалий, цува къаивкIхьурчагу чIарав. Сайки азара инсан усса ифтарданий Муса Маннаровлул оьрмулул ххуллия бусласисса видеороликгу ккаккан дурну, илданун цал уттигу жула бюхттулсса арс дакIнин утансса хIалу дагьунни, ванал цIа дуаьрдавух дишинсса сант дагьунни», – увкунни Постпредствалул отделданул хъунмур, профессор Зоя Хановал.
Жу буссияв ванихь, абадлий цIа личIантIисса Муса Маннаровлун хас дурсса даву щалва миллатгу, Дагъусттаннал агьалигу рязийну личIансса давур тIий.
ДакIнин бутанну, кIийла аьламравун гьаз хьусса, 541 гьантта орбиталий гьан бувсса Муса Маннаровлун мартрал 22-нний 75 шин хъанахъишиву.
ПатIимат Рамазанова
