«Дагъусттан» РИА-лул залдануву хьусса пресс-конференциялий «Движение Первых» дастталугърал Дагъусттанналмур отделениялул хъунмур Людмила Саидовал бувсунни щалвагу Аьрасатнал лагрулийсса «Мурадирттал ёлка» акциялул дайдихьу дуршиву. Ва «Движение Первых» региондалул отделениялул ва Жагьилтурал иширтталсса буллалисса министерствалул уртакьну дуллалисса давур.

ХIакьинусса кьини республикалий 1757 заявка дуллуну дур, вайннува 545 хъирив лавну ххал дурну дур. Заякарду кьамул дуллай байбивхьуну бур ноябрь зурул 15-нний, акциялул дайдихьу дурну дур декабрь зурул 8-нний. Акциялуву гьуртту хьун бучIину бур 3 шинава байбивхьуну 17 шин хьуннинсса оьрчIан: мушакъатсса, ахIвал кIюласса кулпатирттавасса оьрчIан, ятинтуран, СВО-лий гьуртту хьуминнал ва цIусса ­регионнаясса оьрчIан.
«Жу циняв оьрчIал мурадру щаллу бан хьунссар тIисса тамахIрай буру, оьрчIаву ххуймунийнсса, хъинмунийнсса вихшала цIакь хьуншиврул», – увкунни ванил.
ОьрчIру ххари бансса ва акция циняв шагьрурдай ва районнай хьунтIиссар. Ва даву сантирай, низамрай тIайла дуккан дуклаки оьрчIру ва студентъталгу кумаг буллай бур. Бувсунни ванил ва ххуйсса ­давриву хьхьичIунминнавух ЦIуллу-сагъшиву дуруччаврил министерство бушиву, 100 оьрчIал мурад бартбигьин бакIрайнласу бувшиву, гъирарай хIала бухлахисса спонсорталгу бушиву. Акциялуву гьуртту хъанахъисса оьрчIал мурадругу личIи-личIисса бур: луттирду, музыкалул инструментру, спортрал инвентарь, игрушкартту ччишиву бусласисса. Мукунма бур аьрххилий чунмай бунугу гьан ччисса ягу машгьурсса пулансса инсантуращал хьунабакьин ччай бушиву бусласиссагу.
БувчIин бунни, оьрчIру ххари бансса «ссихIирчи» хьун ччиманаща официал сайтрайн («елкажеланий.рф») заявка дулун хьунтIишиву ва февраль зурул 28-ннийн оьрчIал мурадру бартбигьлантIишиву.
«Мурадирттал ёлка» Аьрасатнаву 2018 шиная шиннай дуллалисса акцияр.

ПатIимат Рамазанова