Интернетраву ппив хьусса, хIачIайсса щинал упаковкарттай шанул лях лавгсса, МахIачкъала шагьрулул Жагьилтурал, спортрал ва туризмалул комитетрал хъунама Ися Рамазановлул сурат хьунни халкьуннахсса дакIнийхтунусса аякьалул лишанну.

БакIрайн дагьай цал-цал суратру мукъурттияр чIалачIимур ялтту буклакисса. Хаснува ихтилат, захIматшивурттал хьхьичI жард къакуну, цала даву биттур дуллалиминная бухьурча.
Рирщу гъарал сававну щиналу ливчIсса  шагьрулул агьали хIачIайсса щинацIа хьунни. Ва захIматсса тагьардануву Шагьрулул собраниялул депутат Ися Рамазановлул хъуннасса жаваблувшинна цайнна ларсунни ватанлувтурансса кумаграл ххуллий. Нюжмар ххишалагу хьунни ванал хьхьу-кьини дакъа волонтертуращал агьалиначIан хIачIайсса щин ххилай.
«Нюжмар хьунни Ися анжагъ, янна даххана дан акъасса, шавай къаувкIун», – тIий дур ванал нину Назира.
«Халкь жуйн вихшалдарай бур, жул бурж мунин лайкьну буккавур», – тIий ур Ися, мюхтажшиву дуссаксса  агьалинан кумаг буллантIий ушиврий чIурчIав дуллай.
Шиккува кIицI бан, вай гьантрай хар-хавар бакъа дунияллия лавгсса жагьилсса ссурахъил жижара бан бувкIминначIа щяикIанссавагу мажал бакъая Исян, инсантал хIачIансса щинах ялугьлай буссар тIий.
Ва суратрах буруглай, жула яруннил хьхьичI бацIлай бур цахлува цивппа гъалгъа тIутIисса хьхьичIвасса кадрарду, интернетравух ппив хьуну, агьалинал дакIурдиву асардай ливчIсса. Короновирусрал пандемиялул тагьардануву захIматсса дежурствардая махъ «ЯтIул зоналува» уккавривун, азарханалул жанахIраву чIирайн ттиликI рирщуну игьалаган къис ивкIсса Дагъусттаннал хIакиннал сурат. Ва цамургу –  2023 шинал августрай МахIачкъалалив автозаправка пIякь кусса апатIрал ишру бухлаган буллай, ухха-азу хьусса, чIявусса инсантурал ­оьрмурду ххассал бан къабювхъаврийну яхI гъавгъун,  машиналул яттирай щяивкIсса МЧС-рал зузалал сурат. Вай суратругу хьуссар цайминнал оьрмурду ххассал баврил ххуллий цалами оьрмурдай хIайп къакусса  виричушиврул лишанну.
ХIакьинусса тагьарданул цIунилгу ккаккан дурунни дунияллун Дагъусттаннал халкьуннал язими хасиятру – чумартшиву, дакI цIуцIаву, цайва рахIму къабувну, цаманан кумаг бан хIадурну бушиву.
Ися цувагу пахрулий ур, бартхьхьирирду ялтту лавгун, щиналу ливчIсса шяраваллал агьали ххассал буллай бивкIсса Дагъусттаннал жагьилтурая, хаснува щалагу Аьрасатнал  СКС-лул (Студенческий корпус спасателей)  волонтертурая.
Барчаллагьрай буслай ур ­Аьрасатнал цайми регионнаягу бувкIун бушиву вава корпусрал волонтертал.

Зулайхат Тахакьаева