МахIачкъалалив, Р. ХIамзатовлул цIанийсса Национал библиотекалуву, бюхттулсса даражалий хьунни цIанихсса шаэр ва педагог, хIакьсса патриот Даниял Магьдиевлун 80 шин шаврин хас дурсса аьпалул вечер.
Райондалийгу, республикалийгу ххуйну кIулсса, жяматран бусравсса, хъунаначIагу, чIивиначIагу хIурмат хъунмасса Даниял дакIнин утан бувкIун бия жяматийсса ишккаккулт, творчествалул агьлу, ванал даврил уртакьтал ва выпускниктал, дустал, гъан-маччами. Мероприятие дайдишин хьхьичI экрандалий ккаккан дунни Даниял цала шеъри ккалаккисса ролик. Миллатрал библиотекалул хъунаманал хъиривмур Сарат Жабраиловал: «Добро пожаловать, Даниял Магомедалиевич» куну, мажлис тIитIайхту, щап куну бувцIусса библиотекалул зал кьакъабагьавай хъатру ришлай бия.
– Даниял МахIаммадаьлиевич ия бюхттулсса инсан. Ва жул библиотекалувусса чIярусса мероприятиярттай гьуртту шайссия. Даниял библиотекалувун уххайхту, 1-мур зивулия 6-чинмунийн бияннин щалва библиотека, рухI дуркIсса кунма, чантI учайва. ЧIугу, чIалачIингу ляличIисса дия. Ванал чIу баяйхту, цинявппа кабинетирттава бувккун, яхши-хаш буллан бикIайва, ванал бусласимуних гъирарай вичIи дишайва. Га ия яргсса, кьуват бусса, мурлу хьусса инсан, – увкунни Сарат Аьбдуллаевнал ва тапшур бунни гихунмайсса мажлис бачин бан Дагъусттаннал Чичултрал союзрал хъунаманал хъиривчу, лакрал секциялул хъунама Супиян Оьмаровлуйн.
Даниял Магьдиевлул творчествалия гьарта-гьарзану бусласисса, мунин лахъсса кьимат бишлашисса ихтилат бунни жяматийсса ишккакку Шалласу Шалласуевлул. Мукунма лахъсса кьимат бивщунни ванал Ккурккуллал шяраву бакъассагу, щалагу райондалий патриот тарбиялул ххуллий Данияллул дурсса хъуннасса даврин, кIицI лавгунни ванал сипталий Ккурккуллал шярава дайдихьу дуршиву «БивкIу бакъасса полк» акциялул, щинчIав дакIнин багьаннин му пикри ванан дакIнин багьну бивкIшиву.
Шаэрнал захIматрал ва творчествалул ххуллийсса лайкьшивурттая бувсунни Дагъусттаннал халкьуннал шаэр Мирза Давыдовлул. Данияллущалсса арардая, дусшиврия бусласисса, ванацIун бавхIусса лахIзарду дакIнин бичлачисса ихтилатру бунни Дагъусттаннал Жяматийсса палаталул хъунаманал хъиривчу Сапарбаг Аьбдуллаевлул, Дагъусттаннал халкьуннал виричу, генерал Муслим Даххаевлул, паччахIлугърал ишккакку, Дагъусттаннал бакIчиначIасса Хъунилсриннал советрал вакил Рапи Абакаровлул, чичу, гъанчу Аьвдуссалан Магьдиевлул, Лакрал райондалул Халкьуннал Мажлисрал депутат Ясупа ХIамзаевлул, «Илчи» кказитрал хъунама редактор Руслан Къардашовлул, «Файт Найтс Глобал» ООО-лул президент, гъанчув Камил ХIажиевлул, шаэр Ханича Аьлиевал. Даниял МагьдиевлуцIун бавхIусса ишру дакIнин бичлачисса гьавасрайсса ихтилат бунни дус Аслан Къажлаевлул. Даниялгу дакIнин увтун, ванал шеъри бувккунни, ванал ученица Ангелина Аьлиевал. Ттула учитель ва руководитель дакIнин утлатисса ихтилат бав нагу, «Илчи» кказитрал отделданул редактор Андриана Аьбдуллаевал.
Жул класс Даниял МахIаммадаьлиевичлул цалчинсса выпускри. Ттунма хъунмасса бахтти хьушиврун ккалли бара ваначIа дуклан ва ванал каялувшиндаралу зун кьисмат шаву. Учитель хIисаврайгу, директор хIисаврайгу Даниял МахIаммадаьлиевичлул ца агьамсса кIану бувгьуссар ттул оьрмулуву. Навагу, ттущалва архIал дуклай бивкIмигу хьунабавкьусса, чув-бунугу бавтIсса кIанттурдай, жу мудангу дакIнин утайссар жула ххирасса учитель.
Данияллул цIа дирзсса арснал оьрчIал, чIиви Даниял Магьдиевлул, дурккунни ттаттан хас дурсса назму. Ва кьинисса мероприятиялий Данияллул шеърирду буккин хIадур бувсса Ккурккуллал школалул дуклаки оьрчIаща бучIан къавхьунни лахIунтту дагьну, ххуллу лавкьуну бушиврийн бувну. Учительтал Данияллун хас дурсса мероприятие школалийгу дан дакIний бур.
Данияллул аьпалул мажлисрай цинявппагу ихтилатчитал кIицI лаглай бия ванал оьрчIру тарбия баврил ххуллий бивхьусса захIмат, ванал инсаншиву, чумартшиву, мюхтажнал чIарав ацIан, кумаг бан хIадурсса ивкIшиву.
– Цамуния къатIурчагума, мукьцаллихъайсса шиннардий школалий дарс дихьлай, 35 шинай директоршиву дуллай, циксса оьрчIру кIулшивуртту ва тарбия дуллуну, тIайласса оьрмулул ххуллийн бивчуну бур Данияллул. Циксса ванал учениктал бур лакрал, Дагъусттаннал цIа бюхттул дуллай щалагу дунияллийх ппив хьуну. Мугу дакъарив Данияллул лайкьшивурттавасса ца. Даниял гъалгъа тIисса чIумал инсаннал чурххавун зурзу багьайва, га ччимур къучагъшиву дан хIадурну икIайва. Нава ванащал хъиннува хъунмасса хIаллай кIулну къаикIаврия пашманну икIара, – увкунни Муслим Даххаевлул цала ихтилатраву.
Цумурцагу лахъазан лархъсса адаминал ттиликIрах цIакьсса, дакI тIайласса хъамитайпа буссар учай. Данияллун дакI тIайласса оьрмулул дусну хьусса ванал кулпатрал Анисатлул лайкьшивурттугу ва кьини гьарма кIицI лаглай ия. Акъая шикку цаягу Данияллул къушлийн къаувхсса, Анисатлул ненттабакI тIивтIуну хъамалу къаувсса.
Даниял ххирасса икIайва цинявннан, Дагъусттаннал эстрадалул артистътурангу. Ва мероприятиялия гъалгъа тIий байбивхьусса чIумалва, ванал мажлис хъун бан, тяхъа бан хIадурну буссия мигу. Амма ва жула Дагъусттаннал ялун бивсса пашмансса иширттайн бувну, музыкалулмур бутIа букьан бан багьуна вечерданул программалува.
Ихтилатру къуртал хьуну махъ Данияллул аьпалухьхьун лавгсса цала дустуран хас бувну чивчусса балай увкунни ванал шяравудуш Айна Исмяиловал.
Ахирданий арснал Робертлул дакIнийхтуну барчаллагь увкунни, цала ппу дакIнин утан, ванал мажлисрай гьуртту хьун бувкIсса цинявннахь.
Ххирассия Данияллун цанма мажлисругу, мажлисрал заллу лахъа-хъун ангу. Цува хъунасса инсанналли цама хъун айсса, цама оькки увну, жува ххуй къашайссару, – тIун икIайссия ва, цахьва гьарцанная цIарду мадулларда тIутIиминнахь. Мукунсса уссия жул Даниял МахIаммадаьлиевич. Ккурккуллал жяматран, дустуран, даврил уртакьтуран, учениктуран ва тачIав хъама къаитантIиссар.
Андриана Аьбдуллаева
