Хасъсса аьралий операциялий жанну дуллусса аьралийтурал кулпатирттан кумаг баву, чIарав бацIаву мурадрай, Дагъусттаннал ХIукуматрал постановлениялийн бувну, 2022-ку шинал март зурул 30-нний тIивтIуссар «Все вместе» тIисса социал фонд.
Ванил даву дайдирхьуссар апрель зурул 6-нний. Гьашину фонд зий шанна шин хьунни. Мунин хасну хьунни фондрал каялувчи Салимхан Мирзахановлул пресс-конференция.
Ванал бувсунни шанна шинал лажиндарай фондрал уттинин дурсса ва дуллалисса давурттая, хьунадакьлакьисса захIматшивурттая ва цала чIарав бацIлацIиминная.
– Жу ялув бавцIуну буру арцу дагьлагьисса цаягу инсаннал ми къаларсун къаличIан, кулпатрал цаягу член лях къагьан. Жу байбишару арцу дуллай так цинявннал материаллу щаллу хьуну махъ. Федерал властирдал гьарица кварталданий хIасиллу дайссар вай масъаларттал хIакъираву Аьрасатнал субъектру цукун зий бурив. Му чулуха жула республика хьхьичIунсса регионнал сияхIрай дуссар. Цавагу региондалий жучIава куна республикалул бакIчи бакIра-бакIрах гьарица кулпатрачIан иллай акъассар. Сергей Меликовлул аьралийтурал масъаларттах ххишала дакъа хъуннасса къулагъас дур
Гьарица райондалий аьралийтурал, миннал кулпатирттал масъаларттаха зий дуссар шанна подразделение: Центр занятости, КЦСОН, Социал дузалшиндарал управление. Хасъсса аьралий операциялий жанну дуллуминнал кулпатирттан кумаг баврил масъала цукун щаллу хъанай бурив ххал бан на нава 28 райондалийн ивра.
Хьунабакьай ишру, аьралийтурал гъан-маччаминнан иш-тагьар къакIулшиврийн бувну, документру батIин захIматну бушиврийн бувну, укуннагу цанна дагьайсса арцу ласун, багьагу буллуну, адвокатътал бувгьусса.
Сант дирирну дунура учин ччай бур аьралийтурал ниттихъахь, кулпатирттахь, махъсса гъан-маччанахь, зун цичIар аьркиншинна дакъассар адвокат угьлан. ЗахIматрал ва социал иширттал министерствалул гьарица кулпатрацIун цIакь увсса зузала уссар. Зун цичIар дайшишру къадурну дулун аьркинссар дагьаймур. БувчIу-къабувчIу хъанахъисса кIанттурду бухьурча, буккияра ЗахIматрал ва социал иширттал министерствалийн, жул фондрайн. Жу мудан чIарав буссару. Аьркин дакъана зула арцу адвокатътуран харж мадулларду.
КIулну бикIан: хасъсса аьралий операциялий жан дуллусса аьралийчунал кулпатран Обороналул министерствалул дулун ккаккан дурсса арцул ялун, мунал наградалухгу дулайссар къуллугърал ххюва окладрал лагрулийсса арцу. Уччинсса, кIалазурунсса къахIисавну. Вай гьарзат щаллу дайссар аьралий комиссариатрайхчин.
Вай дакъассагу, дуссар арцу республикалул фондрава дулайссагу. Жан дуллусса аьраличунал кулпатран дагьлагьиссар миллион ва 250 азарда къуруш. Дуссар ХIукуматрал постановлениялий ккаккан дурсса тамансса хIаллихшиннардугу.
Кулпатравусса гьарица инсаннан булайссар пенсия (по потере кормильца). Нину-ппу пенсионертал бухьурча, цаламур пенсиялул ялун 20 азарда къуруш ххи дайссар.
Районнай вай масъалартту щаллу баврил тагьар личIи-личIину дур. ХъунмурчIин райондалул бакIчинайн хъар хъанай дур, – бувсунни Салимхан Мирзахановлул.
Ванал кIицI ларгунни аьралийтурал кулпатирттан кумаг баврил масъала лавайсса даражалий щаллу буллалисса Къизилюртуллал, Къизлардал, Дарбантуллал, Табасараннал, Ахттиял районну. ЛяличIинура кIицI ларгунни Сулайман Стальскийл район. Шикку, федерал ва республикалул дуллалимуницIун, хъунмасса кумаг буллай бур аьралийтурал кулпатирттан меценатътал. Мукунна хъин чулий кIицI ларгунни Къарабудахкантуллал район. Шикку Халкьуннал Мажлисрал депутатътал Залбековлул ва МахIаммадовлул цала личIисса программа сакин дурну дур укунсса кулпатирттан кумаг баву мурадрай. Табасараннал райондалий мукунма цала жиплива кумагру буллай бур депутатътал Сефер Аьлиев ва Имран Аллаев. Цала арцух Аьлиевлул дацIан дунни гьайкаллу Аьрасатнал кIия Виричунан. ЦIуссалакрал райондалул бакIчи МаматIи ХIамзатовлул цалчинминнавух дунни аьралийтуран мемориал ултти.
Аьшттарханнал областьрай зузисса, Сулайман Стальскийл райондалиясса Жамалуттин Пашаев хъунмасса кумаг буллай ур, райондалун акъассагу, республикалунгу. Аьпалул хьусса аьралийтурал кулпатирттан дулун ванал дирчуну дур республикалул фондравун 20 миллион арцул.
Вара райондалиясса ур «Трон» тIисса строительная фирмалул хъунама. Махъсса 10 шинал лажиндарай ванал бувну бур цала шяраву школа, 60 инсаннансса оьрчIал багъ, спортзал, Буттал кIанттул цIанийсса Хъунмасса дяъвилул гьурттучитурансса сквер. ЦIана буллай ур мизит ва медициналул пункт. Вай гьарзатгу цува заллусса аьрщарай. Шиччавасса Аьлимов Сагидлул дирчуну дур «Все вместе» фондравун 5 миллион арцул.
Мирзахановлул бусласимунийн бувну, шинал хьхьичIва Дагъусттаннал ХIукуматрал председательнал гьарица зуруй ца кьинисса цала харж СВО-лун кумагран бичин тапшур бувну бур.
Республикалул къуллугъчитуралгу тикрал дурну дур ванал сипта. Циняв районнал администрациярттал бувгьуну бур фондрайн ца-ца миллион арцул. Аьралий операциялун кумаг буллалиминнавух Мирзахановлул мукунма кIицI лавгунни ФОМС-рал хъунама АхIмад Гудов, Республикалул стоматологиялул клиникалул хъунама хIакин ХIажимурад Мусалов, ОьрчIал реабилитациялул центрданул хъунама хIакин Залимхан Садулаев.
Салимхан Мирзахановлул бувсунни ятIа-тIар бакъами ххал баврил ялувгу Дагъусттаннай ххуйну зий бушиву. Му мурадрай жучIара «Память гор» тIисса организация тIиртIуну душиву. Ванил каялувчи ур хасъсса аьралий операциялий щавурду дирсса аьраличу, республикалул бакIчинал маслихIатчи МахIач Шамилов. Уттинин вайннал мукьцIалуннийн бивсса ятIа-тIар къабивкIсса аьралийтал лявкъуну бур.
КIулну бикIан вайннал номер: 8(963) 544 44 84.
ЯтIа-тIар бакъасса жула аьралийтал лякъин кумаг буллай бур жунма Саоьдуллал Аьрабусттан, Эмираты. Аьрасатнаву официальнайну ва масъалалуха зий бур Генштаб ва Инсаннал ихтиярду дуруччаврил уполномоченныйтал.
ЖучIарагу дур хъуннасса даву дуллалисса «Сила матерей», «Союз женщин Дагестана» организацияртту, дур жула волонтертурал команда.
Фондрал каялувчинал бувсунни журналистътурахь хасъсса аьралий операциялий жанну дуллуминнан хас бувсса лу хIадур буллай ушиву, му аьралий издательствалийхчин итабакьин ччай ушиву. Цила чIумал Оьмар Муртузалиевлул Буттал кIанттул цIанийсса Хъунмасса дяъвилий жанну дуллуминная итабавкьусса «Книга Памяти» кунмасса, ацIва том бусса лу буккантIишиву шинал ахирданий.
Андриана Аьбдуллаева
