Октябрь зурул 19-нний Москавлив Миллатирттал къатлуву хьунни «Инновационный потенциал молодых врачей и их роль в реализации государственной программы развития здравоохранения» тIисса Москавлив ва Москавуллал областьрай зузисса Дагъусттаннаясса жагьилсса хIакинтурал форум.
Ванил сакиншинначи хьунни Москавуллал Культуралул центр «Дагестан». Мероприятие тIитIлай, хIакинтал барча бунни «Дагестан» МЦК-лул президент, профессор, аьралий элмурдал академик Арсен ХIусайновлул. Форумрай гьуртту хьунни спикертал, элмурдал доктортал, студентътал, ординатортал ва МЦК-лул вакилтал. Арсен ХIусайновлул ва МЦК-лучIасса Медициналул зузалтрал ассоциациялул президент Гулизар Башанаевал дуллунни студентътуран, ординатортуран, аспирантътуран ва хIакинтуран Дагъусттаннал ЦIуллу-сагъшиву дуруччаврил министерствалул ва МЦК-лул чулухасса ХIурматрал грамотартту ва Барчаллагьрал чагъарду.
Хасъсса аьралий операциялий щавурду дирсса аьралитуран медициналул кумаг буллай ккаккан дурсса чувшиврухлу ва пишакаршиврухлу Москавуллал областьрайсса Красногорскаллал азарханалул хIакин-невролог ХIусманова Гурикизлун Аьрасатнал ЦIуллу-сагъшиву дуруччаврил профсоюзрал комитетрал чулуха дуллунни медаль.
Мероприятиялул модератор ия Дагъусттаннал лайкь хьусса хIакин, РУДН-лул урологиялул кафедралул доцент Пайзулла Мингболатов. Наградартту ларсъминнавух чансса бакъая лакгу: аьралий хIакин, Аьрасатнал Обороналул министерствалул идаралул отделениялул хъунама Бахрам Аьлиев, Лазерданул хирургиялул клиникалул хъунмур хIакин, невролог Тутубава Башанаева, челюстно-лицевой хирург (ГБУЗ ГКБ №1 им.Н. Пирогова) Мурад Рамазанов, хIакин-отоларинголог (ЧУЗ ЦКБ РЖД-Медицина) Мурад Аьбдуллаев, хIакин-офтальмолог (городская клиническая больница им.С.Боткина) Аьбдул Мисриханов.
Жула хIакинтал барчагу буллай, чIатIий буру пишалул ххуллий так хьхьичIуннайшивуртту ва тIайлабацIурду.
Андриана Аьбдуллаева
