Москавлив «СтоЛичность» тIисса кказит буклан бивкIун бур 2011-ку шиная шихунмай, Москавуллал ХIукуматрал кабакьулийну, «Аргументы и факты» кказитрал гьанулий. Зуруй цал буккайсса «СтоЛичность» кказитрал бусайссар Москавуллал культуралуцIун ва социал оьрмулуцIун бавхIусса иширттая. Ларгсса шинал ахирданий бувксса 12-мур номерданий дуссия Москавлив ялапар хъанахъисса жула лаккудуш, «Дагестан» МЦК-лул ва М.Илиясовал цIанийсса «Дараччи» фондрал чялишсса член Ххадижат Цаххаеваясса макьала. Хъаннил байрандалуцIун бавхIуну, «Илчи» кказитрайгу рищун пикри хьунни.

Ххюра шин хьуну дур фельдшер-лаборант Ххадижат Цаххаева Москавлив ялапар хъанай. Медициналул зузалал пиша бакъассагу, ванил цамургу сянат дур. Ххадижат бур Дагъусттаннал дукрардал усттар. Ва ччя-ччяни лагайссар госпитальлайн, хасъсса аьралий операциялий щавурду дирсса ватанлувтурачIан, Дагъусттаннал дукрардугу дурну. Чуттурду, жура-журасса ххункIру, гьавккури, ккурч…Гьарицагу дукра ванил усттарсса карунницIун дакIнил гъилишивугу дирхьуну дай.
Бувну бур Ххадижат Дагъусттаннай, Чапаево шяраву. Къуртал бувну бур Медициналул колледж ва Дагъусттаннал паччахIлугърал унивеситетрал химиялул ва биологиялул факультет. Зий бивкIун бур шяраваллил азарханалий. Щар хьуну махъ бивзун бур МахIачкъалалив. ОьрчIру Москавуллал медициналул вузирдавун бувххукуннив, МахIачкъалалиягу Москавлив бивзун бур. ЦIана Ххадижат зий бур Санэпидемнадзорданул сфералуву. Ччя-ччяни лагайссар объектирдайн ххалбигьавуртту дан. Вай цимурцаннуцIун Ххадижатлул шеърирдугу чичай. 2023-ку шинал февральданий бувкку­нни «Ттиркьюкьал чарсса» тIисса ­ванил шеърирдал цалчинсса жуж. Вай шеърирдаву Ххадижатлул аьч дурну дур буттал кIанттухсса, Дагъусттаннал улклухсса цила ччаву.
– Вара шинал мартрай на цалчин лавгссара аьралий госпитальданийн хасъсса аьралий операциялий щавурду дирсса ттула ватанлувнах буруган. Мунияр шихунмай мудан занай буссара Москавливсса ва Подмосковьелийсса госпитальлай хъин хъанахъисса аьралийтурачIан, шаймур буллан бикIара миннал дакI дан, ми ххари бан, – тIий бур Ххадижат. Гьай-гьай, шай Ххадижатлуща ми аьдатсса Дагъусттаннал нахIу дукрардайну ххари бан. Ми дан лархьхьуну дур ванин цила ниттицIа, ганингу циламуницIа. Никирая никирайн ирсирай нанисса гьунар.
– Цалчин госпитальданийн на Дагъусттаннай интнил байрандалийн дайсса бартри-гургри дурну бувкIссияв, – дакIнин бутлай бур Ххадижат. Дагъусттаннал кухня ляличIисса, авадансса бур. Жул региондалий ялапар хъанай бур личIи-личIисса миллатру: ярусса, лак, дарги, къумукь, лазги. Гьарица миллатралгу цала-цала дукрарду дур. Барта – му лакрал шахьайсса, нацIусса, нахIу-нацIу бивщуну чIюлу бувсса ччатIри. Аьдатрайн бувну, му Интдайдихьулул байрандалий шавхьун, оьрчIайх бачIайссар. Цалчин палаталувун бартри ларсун бувкIсса чIумал, чIалай бия аьралийтуран байрандалул лахIза асар хьушиву. Цала миллатрал дукралийн аьдат хьусса оьрчIан миннух тамахI бикIай. Утти наниний ци лавсун бучIава,– куну цIуххара. Чуттурду, буркив, бурубуссаннуй ккурч ччан дикIай. Аьралийтуран мукунма ишттахI бикIай дукьра хIанттих. Жу палаталувусса цинявннан диянсса ларсун лагару. Шикку жул ватанлувтал бакъассагу, цайми миллатирттал аьралийталгу бур. Дагъусттаннал дукрарду цинявннан нахIу дизай, ишттахI буну дукай. Яла бусравмур, цIа думур жул лакрал дукра – гьавккурир ( мюрш гьавккури). Гьавккурттул гьарица миллатрал цала жура буссар, – буслай бур Ххадижат (шикку Ххадижатлул буслай бур лакрал мюрш гьавккурттул рецепт, жура му лях гьан данну А.А.). Аьралийтуран мукунма ххирар бувцIу ххункIру, хаснува ккунуккирттал ххункIру. Мигу Дагъустта­ннал кухнялул яла цIа дуркми дукрардавасса цар. БувцIу ххункIру байссар мукунма дикIуя, чIукьа нисирая, нувщуя.
Вивраращалсса бурубуссаннуй ккурч … Ванил нахIушиврия буслай бусан къахьунссар (рецепт). Ва шахьангу усттаршиву аьркинссар.
Ххадижатлул бусласимунийн бувну, госпитальлайсса аьралийтурал цинявннал тавакъю байсса бур дукьра хIан ларсун бухьхьу куну. Ва чансса оьруснал квасраха лархьхьусса хIачIия дур.
– Жула дукрарду ларсун бувкIсса чIумал аьралийтал муксса ххари шай, шаппайн бивссаксса хьуру тIун бикIай, нагу гайннацIа ххари шара, яла-ялагу гьан гъира бикIай, – тIий бур Ххадижат.
Волонтершиврулгу цила аьш кьариртун дур ванил дакIниву. Му аьч хьунни ванил творчествалувугу. Бувккунни ца ттигу шеърирдал жуж. Ва хас бувну бур Ватан дуручлачисса аьралийтуран. Цал бунугу цуппа хьунабавкьусса аьралийтуращал Ххадижатлул дахIаву дур ми госпитальлая лавгун махъгу. Гьарицаманал цала кIану бувгьуну бур ванил дакIниву. Ххадижатлул оьрчIалгу ванил шаттирдайх лавгун медицина язи дургьуну дур. Душ госпитальданий зий бур, арс медициналул вузраву дуклай ур. Ххадижат цуппарив цила агьаммур даврицIун ва волонтерствалуцIун, Москавлив ялапар хъанахъисса лакрал жагьилтурахь лакку мазрал дарсругу дихьлай бур. Дарсирдайнгу ва цила нахIу дукрарду ларсун бучIай, студентътуран ватандалул тIин-тIааьн хъама къабитан.
Анна Соколова

Таржума бувссар
Андриана Аьбдуллаевал