Ниттил мазрал кьинилун хасну Гъумук Центральный библиотекалий хьунни «Лакку маз – миллатрал ттарцIри» тIисса цIанилусса шадлугъ.
Ва хIадур дурну дия библиотекарь ПатIимат ЛухIуевал. Ванил бувсунни ниттил мазрал инсаннал оьрмулуву цукунсса кIану бугьлай буссарив, цуксса агьамшиву дуссарив ниттил маз кIулну бикIаврил ва буруччаврил. ДакIнин бувтунни мазрал грамматикалуцIун бавхIусса лахIзарду, лакрал цалчинсса грамматика сакин дурсса этнограф ва лингвист Петр Карлович Услар, кIицI лавгунни мазраха гихунмай зий бивкIми ва мазраву хьусса дахханашивуртту.
Дуклаки оьрчIал дянив хьунни ниттил маз цуманан ххуйну кIулну бурив чIалачIи буллалисса викторина. Ва кьини оьрчIру кIул хьунни лакку мазравусса, хъамабитала хъанахъисса, нажагь бакъа ишла къабувайсса ягу бувагу къабувайсса мукъурттищал. ОьрчIал дурккунни лакку мазрайсса назмурду.
Ва хьунабакьаврийн оьвкуну бия оьрчIан тарбия ва кIулшивуртту дулаврин цила оьрмулул цимигу шин харж дурсса, цIана пенсиялийсса учительница, ва библиотекалул муданмасса букку, Аьйша Давудовнайн. Ванилгу оьрчIал хьхьичI буллалисса цилва ихтилатраву кIицI ларгунни инсаннал оьрмулувусса ниттил мазрал агьамшиву, гьарцамагу цалва миллатралгу, мазралгу патриотну икIан аьркиншиву.
Ниттил мазрал кьинилун хасну хIадур дурну дия лакрал чичултрал ва шаэртурал луттирдал выставкагу.
Бадрижамал Аьлиева
