ЦIуссалакрал райондалул бакIчи МаматIи ХIамзатовлуйн бувкIунни ТIюхчардал шяравасса хасъсса аьралий операциялий гьуртту хъанахъисса Неъматуллагь Апанниевлул аьралий частьрал командирнал чулухасса Барчаллагьрал чагъар.
Ваний кIицI ларгун дур Неъматуллагьлул Ватандалул мурадру буручлай ккаккан дурсса къучагъшивуртту.
«ДакIнийхтуну барчаллагьрай ура Апанниев Неъматуллагь Увайсович тарбия увсса ЦIуссалакрал агьулдануйн. Хасъсса аьралий операциялий гьуртту хъанай айивхьуния шийнай, Неъматуллагь Увайсовичлул аьралий буржру лавайсса даражалий бартбигьлай, цимилгу ккаккан дунни кьянкьа-кьурчIисса дагъусттанлувнал хасият ва къучагъшиву.
Гьалмахтурал дянивгу Неъматуллагь Увайсович хIурмат-кьимат буну, бусравну ва цинявннан эбратну ур. ХIакьину укунсса аьралитурайри Аьрасат бавцIусса», – тIий чивчуну бур чагъарданий.
