Октябрьданул 22-нний ДР-лул Халкьуннал Мажлисрал бюджетрал, финансирттал ва налогирттал комитетрал хъунама Марат Илиясов, Халкьуннал Мажлисрал КПРФ-лул фракциялул каялувчи Самир Аьбдулхаликьов ва МахIачкъала шагьрулул Депутатътурал Мажлисрал хъунама Марис Илиясов гьурттусса делегация, Дагъусттаннал бакIчи Сергей Меликовлул ва ДР-лул Халкьуннал Мажлисрал хъунама Заур Аскандаровлул амрулийн бувну, лавгунни Луганскаллал областьрай талатисса «Каспий» батальондалул аьралитуран гуманитар кумаг лавсун.

Вайннал жап увкунни батальондалул каялувчитуращал ва аьралитуращал, кIул хьунни аьралитал ялапар хъана­хъисса шартIирдащал, барчаллагь увкунни талатаврил майданнай ккаккан дуллалисса чувшивурттахлу.
Талаталтран кумагран дуллунни мюхчаншиву дуруччин­сса техника. ДР-лул Халкьуннал Мажлисрал, КПРФ фракциялул, МахIачкъала шагьрулул Депутатътурал собраниялул ва Лакрал райондалул бакIчи Юсуп МахIаммадовлул чулуха­сса ХIурматрал грамотартту ва Барчаллагьрал чагъарду.
Депутатътурал кIицI лавгунни жула паччахIлугърал мюхчаншиву дуруччаврил ххуллий аьралитурал ккаккан дуллалисса виричушивуртту. «Барчаллагь зун, жанну хIайп къакуну жула билаятрал мюхчаншиврул къаралданий бавцIуну бушиврухлу. Зул къуллугърал ккаккан дуллалиссар Буттал кIанттухсса ччаву», – увкунни депутатътурал.
КIицI лавгунни Дагъусттаннал агьали ялугьлай бушиву аьзизсса батальон шаппай зана шаврих.

Зулайхат Тахакьаева